Oseas 2 - Kalin Apo Dios

Nan Layad Apo Dios Isnan Ipogawna 2:14-23

¹⁴ Kankanan nan apo en, “Iyeyko kasin si asawak isnan pondag daket ay-ayaken siya isdi isnan makaawis ay kali.

¹⁵ Awnitko isagong nan onasana daket esten nan nadidiyok ay makwani en kad-an di napaligatan is segpan di namnama. Awnitna owenan sak-en isdi ay kaneg din inikkana isdin kababassangna ay nagapowana id Egipto.

¹⁶ Et awnitna kasin pangadnan sak-en is ‘Asawak’ imbis ay pangwanina et ‘Baal’.

¹⁷ Awnitna adi kankanan wenno dengdengen kasin nan ngadan ay Baal.

¹⁸ Isnan deey ay timpo et awnitak makitolag isnan am-in ay atap ay animal ya koyat tapno adida paeg-egyaten nan ipogawko. Awnitko gedan kaanen am-in ay maosal isnan gobat, am-in ay gamig ya pana isnan iliyo tapno menlamlamnin nan ipogawko isnan matatagowanda ay maid iyeg-egyatda.

¹⁹ Israel, awnitak asawaen sik-a daket adi taytaynan sik-a. Dakpay itoltoloy ay manglaylayad ya mangsegseg-ang ken sik-a ya awnitak menkowa sik-a ay eng-enggana.

²⁰ Awnitko tongpalen nan inkalik et mangtekam et ay sak-en nan apo.

^21-22 Isnan deey ay timpo et awnitko idnge nan lowalon nan ipogawko ay Israelita. Daket ipaodan ta tomobo nan pagpagey, obas ya olibo isnan batawa.

²³ Dakpay olnosen nan ipogawko isnan dagada ya pasikaek daida. Et nan ipogaw ay egay kalaylayad et awnitak ipaila nan layadko ken daida. Nan makwani en bakenko ipogaw et awnitak kanan en ipogawko. Dadat et kanan ken sak-en en, ‘Sik-a nan tet-ewa ay Diosmi.’ ”