Ookom 6 - Kalin Apo Dios

¹¹ Isnan namingsan et inbaan nan apo nan anghelna id Ofra. Omdan pay isdi dat tomokdo isnan silok di dakkel ay kaiw ay kowan Joas ay apon din si Abiezer dapay si Gideon ay anak Joas et mentatabon ay menbaybayo is pagey isnan paggilingan di obas tapno adi ilaen nan Midianitas ay bosoda.

¹² Dat menpaila san anghel Apo Dios ken siya et kanana en, “Wada nan apo ken sik-a, sik-a ay natoled ya napigsa.”

¹³ Dat kanan Gideon en, “No wada obpay nan apo ken dakami et dakamin aped mapalpaligatan? Into pay obpay din kaskasdaaw ay inbagbagan nan am-ami ay inik-ikkan nan apo ay kaneg din nang-ikaanana ken daida id Egipto? Ngem id wani binaybay-an et nan apo dakami isnan kabaelan di Midianitas.”

¹⁴ Dat kanan nan apo ken Gideon en, “Isnan am-in ay pigsam et omeyka ta isalakanmo nan Israelita isnan kabaelan di Midianitas. Sak-en mismo nan mangibaa ken sik-a.”

¹⁵ Dat kanan Gideon en, “Ngem apo, intoy ikkak ay mangisalakan isnan Israelita dapay nan pamilyak nan kakapsotan isnan aap-on din si Manases ya sak-en nan kababaan isnan pamilyan ama?”

¹⁶ Dat kanan nan apo en, “Ngem sak-en nan mangbadang ken sik-a isonga awnit nalakalaka nan mang-abakam isnan Midianitas ay kanegda es-esa ay lalaki et kedeng.”

¹⁷ Dat kanan Gideon en, “No magasinganka ken sak-en, kadya ngalod omipailaka is mangpaneknek ay tet-ewa ay sik-a apo nan makikalkali ken sak-en.

¹⁸ Pangaasim ta adika od komakaan engganay omiyaliyak is makan ay itedko ken sik-a.” Dat kanan nan apo en, “Menteteeak engganay somagongka.”

¹⁹ Dat songgep si Gideon isnan baeyna et otowena nan anak di kalding ya ninmasa is esay kilo ay arina ay otowena is tinapay ay maid bobodna. Danat iyey nan tinapay, nan nabibitoto ay naoto ay kalni ya nan nasosokong ay digo issan anghel Apo Dios ay wada issan silok di kaiw.

²⁰ Dat kanan nan anghel ken siya en, “Ippeymo nan kalni ya nan tinapay isnan naay bato dakat ipakbo nan digo isnan osonda.” Dat tet-ewa ikkan Gideon.

²¹ Dat isikgad san anghel Apo Dios nan sokodna issan kalni ya tinapay dat bomala nan apoy issan bato et mapoowan san kalni ya tinapay. Dat mamaid san anghel.

²² Idi nagtekan Gideon ay anghel Apo Dios san inilana dat omegyat et kanana en, “Kangatowan ay apo, ay inayan inilak mismo nan angas di anghelmo.”

²³ Ngem dat kanan nan apo en, “Adika omegyat. Menlamlamninka tay adika matey.”

²⁴ Dat somapo si Gideon is altar isdi pala isnan apo danat ngadnan is “Nan apo nan mang-it-ited is talna.” Et enggana id wani et daan kayet nan naay altar id Ofra isnan sakop nan dagan din si Abiezer.