Nomero 27 - Kalin Apo Dios

Nan Nadotokan Josue Ay Mangsokat Ken Moses 27:12-23

¹² Nadandan pay nan kaat ay agew dat kanan nan apo ken Moses en, “Tomikidka isnan bilig ay Abarim ta osdongam nan daga ay idyak isnan Israelita.

¹³ No makwas ay inilam nan deey ay daga et awnitka matey ay kaneg nan besatmo ay si Aaron

¹⁴ tay egayyo tinongpal ay dowa din inbagak isnan pondag nan Zin. Isdin ninliliyan nan sanada ay ipogaw maipanggep ken sak-en id Meriba et egayyo inpagtek nan osto ay panakabalinko ken daida.” Nan Meriba et siya san balaan id Kades isnan pondag nan Zin.

¹⁵ Dat menlowalo si Moses et kanana en,

¹⁶ “apo ay Dios ay nagapowan di am-in ay biyag, pangaasim ngalod ta mendotokka is esay lalaki ay makaipango isnan deeyday ipogaw

¹⁷ ya makamandal ken daida ay makigobat tapno bakenda kaneg kalnilo ay maid mangipaspastol ken daida.”

¹⁸ Dat kanan nan apo ken Moses en, “Ayagam si Josue ay anak Nun ay esang ay makabael ay men-ipango ta ipatangmo nan ledengmo ken siya ay mangipaila ay siya nan mangipango isnan Israelita.

¹⁹ Patakdegem isnan sagang Eleazar ay padi ya isnan sagang nan sinpangili dakat ibaga ken daida ay siya nan mangsokat ken sik-a.

²⁰ Idyam ken siya nan tap-in di kalebbengam tapno tongpalen nan sinpangilin di Israel siya.

²¹ Awnit menpabadbadang ken Eleazar ay padi tay siya nan awnit mensossoot ken sak-en isnan osto ay ikkanda isnan mang-osalana isnan urim ya tummim. Et siya na nan ikkan Eleazar ay mang-itdo ken Josue ya nan sinpangilin di Israel isnan am-in ay ik-ikkanda.”

²² Dat ikkan Moses nan inbilin nan apo ken siya. Pinatakdegna si Josue isnan sagang Eleazar ay padi ya isnan sagang nan sinpangili

²³ danat ipatang nan ledengna isnan olon Josue danapay ipagtek ay siya nan mangsokat ken siya.