Nomero 20 - Kalin Apo Dios

Nan Nangpabalaan Moses Is Danom Isnan Bato 20:1-13

¹ Isnan omona ay bowan isnan maikaepatpoo ay tew-en di ninbab-aatan nan Israelita et inomdanda isnan pondag nan Zin dadat menkampo id Kades. Et isdi nan nateyan ya naikaoban nan besat da Moses ken Aaron ay si Miriam.

² Maid danom isnan deey ay ninteanda isonga dat maolnong nan ipogaw isnan sagang da Moses ken Aaron

³ et menlilida ay mangwani en, “Gag-awis pay ay naitapi kami ay natey issan iib-ami ay Israelita ay natey issan sagang di natoldaan ay pagdaydayawan id kasin.

⁴ Ayta od dakan inyali dakami isnan naay ay pondag? Waay kanam ngen en ta matey kami isna pati nan talakenmi.

⁵ Ayta dakan inpakaan dakami id Egipto dakat iyali dakami isnan naay asiasi ay tean ay maid polos tomobo is mola? Maid pagey, maid higos, maid obas ya maid tap-in di kaiw. Maid pay danom is mainom.”

⁶ Dat taynan da Moses ken Aaron nan deeyday ipogaw et itakdegda issan segpan nan natoldaan ay pagdaydayawan. Dadat menlokbob dat menpaila ken daida nan somili ay kawad-an nan apo.

⁷ Dat kanan nan apo ken Moses en,

⁸ “Alaem nan sokod ay wada isnan sagang san baol ay naipapay-an nan dowa ay nadadampig ay bato ay naisolatan nan simpoo ay lintegko. Dakayot dagopen ken Aaron nan sinpangili dayot toyyen nan bato isnan sagangda am-in et awnit bomala nan danom. Siya na nan ikkam ay men-ipabala is danom isnan bato ta waday inomen nan sanada ay ipogaw ya nan talakenda.”

⁹ Daet omey alaen Moses san sokod ay inbagan nan apo ken siya.

¹⁰ Dadat dagopen ken Aaron nan sinpangili isnan sagang san bato dat kanan Moses en, “Dengngenyo dakayo ay nasokil. Ay masapol di omala kami is danom isnan naay bato is pala ken dakayo?”

¹¹ Dat ingaton Moses san sokod et ipat-ona ay mamindowa issan bato dat kabanala nan danom et ominom am-in san ipogaw ya nan tatalakenda.

¹² Dat sagiiten nan apo da Moses ken Aaron et kanana en, “Gapo tay kolang nan pammatiyo ay mangipagtek isnan panakabalinko isnan Israelita ay baken san kinwanik ay maikkan is inikkanyo et awnit baken kayo is mangipango isnan naayda ay ipogaw ay songgep isnan daga ay inkalik ay idya ken daida.”

¹³ Inommat na id Meriba ay ninliliyan nan Israelita maipanggep isnan apo ya siya nan nangipailaana isnan kinadiosna.

Nan Nateyan Aaron 20:22-29

²² Kinmaan am-in nan Israelita id Kades et omeyda isnan bilig ay Hor

²³ isnan pengpeng di Edom. Dat kanan nan apo ken da Moses ken Aaron en,

²⁴ “Adi makaey si Aaron isnan daga ay inkalik en idyak isnan Israelita nodi matey siya tay egayyo inikkan ay dowa din inbagak maipanggep din danom id Meriba.

²⁵ Ayagam si Aaron ya nan anakna ay si Eleazar ta tomikid kayo isnan bilig ay Hor.

²⁶ Kaanem nan badon di padi ay inbabadon Aaron ta ipabadom ken Eleazar tay matey si Aaron isdi.”

²⁷ Dat ikkan tet-ewa Moses nan inbagan nan apo et tomikidda isnan bilig ay Hor ay iilaen nan Israelita.

²⁸ Dat kaanen Moses nan badon Aaron et ipabadona ken Eleazar. Et natey si Aaron isnan toktok san bilig. Dat gomowab da Moses ken Eleazar ay nagapo issan bilig.

²⁹ Et idi gintek nan Israelita ay natey si Aaron dadat ilemet siya is tolompoo ay agew.