Nomero 14 - Kalin Apo Dios

Nan Ninliliyan Nan Deeyday Ipogaw 14:1-10

¹ Sinlabiyan ay nin-ag-aga nan deeyday ipogaw gapo isnan seg-angda isnan aw-awakda.

² Dadat menlili ken da Moses ken Aaron et kananda en, “Gag-awis pay ay natey kami id Egipto wenno isnan naay pondag.

³ Ayta od dan iyey pay laeng nan apo datako isnan sana ay ili. Awnit tako aped mapatey isnan gobat dat madpap nan as-awa tako ya nan an-ak tako. Gag-awis samet no somagong tako laengen id Egipto.”

⁴ Dadat men-asikwani en, “Pomili tako is mangipangpango ken datako ta somagong tako laengen id Egipto.”

⁵ Dat menlokbob da Moses ken Aaron isnan sagang am-in san kaipoipogaw.

⁶ Dat mensingat da Josue ay anak Nun ya si Caleb ay anak Jefone nan badbadoda gapo is sakit di nemnemda. Daida ay dowa san ib-an di naibaa ay inmey ninpasyal issan deey ay ili.

⁷ Dadat kanan issan deeyday ipogaw en, “Dapay san ili ay inmeymi inila et gawigawis ya magabay.

⁸ Et no ikkan tako nan kayten nan apo et awnit iyeyna datako id isdi danat idya ken datako nan deey ay gawigawis ya magabay ay daga.

⁹ Adiyo dokogan nan apo ya adi kayo omeg-egyat isnan ipogaw isdi. Awnit nalaka nan mang-abakan tako ken daida tay badbadangan nan apo datako ya epdasna inabak nan didiosda ay mangbabantay ken daida isonga adi kayo omegyat.”

¹⁰ Kanan nan deeyda ay ipogaw en ta gayangenda koma daida ta mateyda ngem dat menpaila nan somili ay kawad-an nan apo isnan ngangatowen san natoldaan ay pagdaydayawan.

Nan Nangilowalowan Moses Isnan Deeyday Ipogaw 14:11-25

¹¹ Dat kanan nan apo ken Moses en, “Kaatna pay nan kabayag nan mang-ad-adiyan nan naayda ay ipogaw ken sak-en? Kaatna pay nan kabayag nan kamaid talekda ken sak-en dapay adoado nan kaskasdaaw ay inpap-aailak ken daida?

¹² Omipaiyaliyak is kaeegyat ay sakit ta mateyda am-in ngem awnitak paad-adowen nan aan-akmo ta ad-ad-ado ya napigpigsa kayo mo daida id wani.”

¹³ Ngem dat kanan Moses isnan apo en, “Inbalam nan naayda ay ipogaw id Egipto isnan panakabalinmo. No dengngen nan iyEgipto nan ikkam isnan ipogawmo

¹⁴ et awnit ibagada isnan ipogaw ay mentetee id isna dapay nan ipogaw isna et dinngeda et ay sik-a ay apo nan wada isnan liboo ay ipail-ilam ken dakami ay ipogawmo. Getkenda pay ay ipangpangom dakami isnan mendad-aananmi isnan omon-on-onaam ay kaneg napoponok ay liboo isnan kag-aw ya kaneg menbidbidang ay apoy isnan labi.

¹⁵ Dat id wani pay no pateyem am-in nan naayday ipogawmo et awnit kanan nan kailiili ay nangdengdenge isnan kabaelam en

¹⁶ pinateymo daida isnan pondag gapo tay adika makaiyey ken daida isnan daga ay inkalim en idyam ken daida.

¹⁷ Isonga id wani et dawatek ay ipailam ken dakami nan panakabalinmo ta ikkam din inkalim isdin nangwaniyam en,

¹⁸ ‘Sak-en ay apo et bakenak nalaka ay makaliget et ipailak nan adi menbalbaliw ay layadko ya matalekak. Pakawanek gedan nan basol ya kinasokil. Ngem dosaek nan aan-ak ya aap-oyo isnan maikatlo ya maikap-at gapo isnan basol nan kaan-ak ken daida.’

¹⁹ Isonga gapo tay managlayadka ay pilmi et dawatek ken sik-a ay pakawanem nan basol nan naayday ipogaw ay kaneg din nangpakawanam ken daida enggana isdin kinmaananda id Egipto.”

²⁰ Dat kanan nan apo en, “Pakawanek daida ay kaneg nan dawatmo.

²¹ Ngem ibagak ken sik-a ay isnan kawadaak isnan naay batawa et tet-ewa

²² ay awnit maid matago isnan naayda ay aamam-a is esa songgep isnan deey ay daga. Inilada nan somili ay silangko isnan ninpap-ailaak ya nan kaskasdaaw ay inpailak id Egipto ya isnan pondag ngem namin-ado ay pinadasda nan anosko ya adida kayten ay tongpalen sak-en

²³ isonga adida polos makasgep isnan daga ay inkalik ay idya isdin aal-apoda. Maid olay esang isnan nang-adi ken sak-en is makasgep isnan deey ay daga.

²⁴ Ngem gapo tay si Caleb et naiitken nan ogalina ya egay polos nangdokdokog et awnitak iyey siya issan daga ay inilana et awnit kowan nan aan-ak ya aap-ona.

²⁵ Ngem gapo tay nan tanapna et siya nan mentetean nan Amalekita ya nan Cananeo isonga is wakgat dakayot somagong ta omey kayo isnan pondag ay menpaey isnan baybay ay makwani en Gadangdang.”