Nomero 13 - Kalin Apo Dios

Nan Inmey Nin-ila Id Canaan 13:17-33

¹⁷ Nganngani ay omdan nan Israelita id Canaan dat ibaan Moses nan pinilina ay lalalaki ay mangipangpango et kanana ken daida en, “Menlobwat kayo ta omey kayo menpasyal isnan am-in ay sakop di Canaan. Ilogiyo isnan pondagna et enggana isnan bilbilig.

¹⁸ Dayot ilaen no ngan nan kaneg nan ili ay deey, no kaat nan kaad-adon nan ipogaw ay mentetee isdi ya no ngan nan kaneg nan kapigsada.

¹⁹ Ilaenyo pay no mapaay wenno adi nan lota isdi ya no nas-et ay naseyatan nan il-ilida.

²⁰ Ilaenyo gedan no magabay nan lota ya no mapagpag nan deey ay ili. Dakayot sigoladowen ay omisaa is begas nan kaiw ay wada id isdi.” Kinwanina di tay osto ay siya di nan timpo ay mam-aom nan begas di kaiw.

²¹ Dat omey san deeyday lalalaki et solsolenda id Canaan ay menlogi isnan pondag nan Zin isnan akin-abagatan enggana id Rehab ay sag-en nan daan isnan bilig ay menpaey id Hamat isnan amyanan.

²² Inmeyda on-ona isnan akin-abagatan nan deey ay daga esadapay omey id Hebron ay ilin nan aap-on din si Ahiman, si Sesai ya din si Talmai ay kap-owan di dadadadakke ay ipogaw ay makwani en Anakim. Nan ili ay Hebron et inmon-ona is pito ay tew-en mo nan ili ay Zoan ay ili id sangasangadom id Egipto.

²³ Inomdanda isnan nagogowab ay bilig ay makwani en Escol et isdi nan nang-alaanda isnan esay sangan di obas ay nanamyos nan begasna isonga mendagsen et masapol di dowa is ipogaw ay mang-assiw. Nin-isaada pay is tap-in di begas di kaiw.

²⁴ Nangadnan san deey ay logal is Escol gapo isnan ninkakamyos ay obas ay kaneg nan inalada ay indatdatengda.

²⁵ Nakwas pay nan epatpoo ay agew ay nangsolsolsolanda isnan deey ay ili dadat somagong

²⁶ isnan kad-an da Moses, Aaron, ya isnan sinpangilin nan Israelita id Kades isnan pondag nan Paran. Inpagtekda nan inil-ilada dadapay ipaila nan begas di kaiw ay indatdatengda.

²⁷ Kinwanida ken Moses en, “Inilami san deey ay daga et gawigawis ya magabay. Naayda nan kaneg nan begas nan esek isdi.

²⁸ Ngem ninkapipigsa nan ipogaw isdi. Dadadadakke ya nas-enas-et nan il-ilida. Inilami pay nan aap-on di dadadadakke ay ipogaw id isdi.

²⁹ Nan Amalekita et isnan akin-abagatan nan teanda. Nan pay Heteo, Jebuseo ya Amorreo et isnan nabilbiligana ay ili nan kad-anda dapay nan Cananeo et isnan benget di Baybay ay Mediterranean ya isnan benget nan Ginawang ay Jordan.”

³⁰ Dat paginken Caleb nan deeyday ipogaw ay menlillili ken Moses et kanana en, “Masapol ay omey tako et ay manggowad isnan deey ay ili. Napigsa tako met et kabaelan tako ay manggowad isnan deeyday daga.”

³¹ Ngem dat kanan nan lalalaki ay boweg Caleb en, “Adi tay adi tako kabaelan ay manggobat ken daida. Napigpigsa nan ipogaw isdi mo datako.”

³² Gapo isnan naay et nan baken tet-ewa nan inbagbagada isnan Israelita maipanggep isnan daga ay omeyda inila. Kinwanida en, “Isnan deey ay daga et adi omanay nan ap-apitenda is kanenda dapay am-in nan ipogaw ay inilami isdi et dadadadakkeda.

³³ Inilami pay isdi nan dadadadakke ay ipogaw ay aap-on din si Anak. Nan panangliknami isnan aw-awakmi et kan-eg kami dodon et waay kaneg todi gedan nan pang-iilaanda ken dakami.”