Nomero 11 - Kalin Apo Dios

Nan Nangpiliyan Moses Isnan Pitompoo Ay Men-ipangpango 11:4-6 , 10-17 24-34

⁴ Wadada nan baken Israelita ay naknakkey isnan Israelita isnan ninbab-aatanda. Menbigawda ay pilmi is kalni dat olay nan Israelita dadapay ilogi ay menlili ay mangwani en, “Wada komay kalni.

⁵ Id Egipto et kanasisida tako isnan am-in ay ikan ay kayat tako dapay libli. Aye pay san kasimon, sandia, kotsay, lasona ya bawang.

⁶ Ngem id wani et maid pigsa tako tay maid teken is makan nodi mana ay winakgat.”

¹⁰ Dinngen Moses am-in nan lilin nan ipogaw issan nadadagopanda isnan segpan nan bawbawida. Dadama nan liget nan apo dapay lomiget abes si Moses

¹¹ danat kanan isnan apo en, “Aye pay nan mangpalpaligatam ken sak-en. Dakan adi mapnek ken sak-en? Dakan aped kanan en sak-en di makigad ken datona?

¹² Bakenak met is nangiyanak wenno nangboliw ken daida. Dan aped sak-en nan kanam en mang-ila ken daida ay kanegak palaliwliw-atda ta aawitek daida ay kaneg engnga ay mang-iyey isnan daga ay inkalim isdin alal-apoda id kasikasin?

¹³ Into pay et di omalaak is kalni is itedko isnan naayda ay ipogaw? Manglenglelenglengda en agtak daida is kalni.

¹⁴ Adiyak mabaelan ay makekedeng ay mang-ayowan isnan naayday ipogaw. Pilmida is babantayak.

¹⁵ Mo siya na kayet nan ikakam ken sak-en et maseg-angka ta mangpateyka ta adiyak itotototoled nan dadama ay ligat ay naay.”

¹⁶ Dat kanan nan apo ken Moses en, “Domagopka ngalod is pitompoo ay nadayaw ay lalalaki ay makwani en men-ipangpango isnan ipogaw dakat ipaali daida isnan sagang di natoldaan ay pagdaydayawan dakat ibaga ken daida ta itakdegda isnan sag-enmo.

¹⁷ Et awnitak gomwab et makikaliyak ken sik-a isdi daket omala isnan tapin di laing ay nagapo isnan Ispiritok ay inidyak ken sik-a et idyak abes ken daida ta badanganda sik-a isnan biyangmo isnan naayda ay ipogaw et awnit adim iyeesang ay mang-aw-awit et.”

²⁴ Dat bomala si Moses et omeyna ibaga isnan ipogaw nan inbagan nan apo. Dinagopna nan pitompoo ay men-ipangpango ay lalalaki danat ipaey daida isnan kad-an di natoldaan ay pagdaydayawan.

²⁵ Dat gomowab nan apo ay naitatapi isnan liboo et makikali ken Moses. Inalana nan tapin di laing ay nagapo isnan Ispiritona ay inidyana ken Moses id kasin et idyana issan pitompoo ay men-ipangpango ay lalalaki. Idi sinonggep nan Ispirito ken daida, ilogida et ay masibobogaw is siawyan ay kan-egda mamadto.

²⁶ Nan dowa issan pitompoo ay men-ipangpango ay da Eldad ken Medad et egayda inmey issan natoldaan ay pagdaydayawan. Dat sinonggep nan Ispirito ken daida isnan kad-anda dadat abes menbogaw ay kan-egda mamadto.

²⁷ Dat omey nan esay baballo ay mangibaga ken Moses isnan ik-ikkan da Eldad ken Medad.

²⁸ Dat menkali si Josue ay anak Nun ay nangbadbadang ken Moses enggana isdin kababallona et kanana ken siya en, “Pasaldengem kad daida.”

²⁹ Dat kanan Moses en, “Ay madanaganka od ken sak-en? Sapay koma kitdin ta idyan nan apo nan Ispiritona isnan am-in ay ipogawna ta men-ipadtoda ay kaneg mamadto.”

³⁰ Dat somagong si Moses ya nan pitompoo ay aamam-an di Israelita issan ninkampowanda.

³¹ Nakwas pay di dat ipaey nan apo nan dagem ay nang-iyey is kasabasabag ay nagapo isnan bandan di baybay. Waay esay metro nan kangaton nan tayawenda ay magapo isnan lota. Inompada isnan liliwesen nan kampoda ya enggana isnan ado ay kilometro nan kaad-addawina.

³² Isonga isnan deey ay agew et nindepdepap nan kaipoipogaw is sabag ya siyangna gedan isnan kawakgatana. Adi komolang is epatpoo ya limay sako nan inolnong di wasdin esa. Pinaltida dadapay ibilag isnan liliwesen nan kampoda.

³³ Ngem egay pay laeng naamin san kalni dat makaliget nan apo danat ipaey nan pilmi ay sakit ken daida.

³⁴ Isonga nangadnan nan deey ay logal is Kibrot Hattava tay isdi nan naikaoban nan ipogaw ay pilmi ay ninbigaw is kalni.