Nehemias 9 - Kalin Apo Dios

^1a Issan maikadowampoo et epat ay agew issan deey met laeng ay bowan dat kasin madagop nan Israelita.

⁵ Dat kanan nan Levita ay da Jesua, Kadmiel, Bani, Hasabneyas, Serebias, Hodias, Sebanias yas Petahias en, “Itakdegyo ta dayawenyo nan apo ay Diosyo ay wawawawada ay maid patenggana. Madaydayawka koma apo tay sik-a nan kapatgan ya kangatowan isnan am-in.

⁶ Sik-a nan kedkedeng ay apo. Binoliwmo nan batawa, nan daya, nan baybay ya nan am-in ay wada ken daida. Isnan am-in datona et sik-a nan mangtetena dapay daydayawen am-in ay wada id daya sik-a.

⁷ Sik-a apo ay Dios nan nangpili ken Abram dakat ikaan siya id Ur isnan Babilonia dakat sokatan nan ngadana is Abraham.

⁸ Nailam ay matalek ken sik-a dakat makitolag ken siya. Inkalim ay idyam ken siya ya isnan aap-ona nan dagan di iCanaan, di iHeteo, di Amorreo, di Perezeo, Jebuseo ya Gergeso. Et tinongpalmo nan inkalim gapo tay matalekka.

⁹ Nailam nan napalpaligatan din al-apomi id Egipto ya dinngem din nin-ad-adawaganda ay menpabadang isdin kad-anda isnan Gadangdang ay Baybay.

¹⁰ Inpailam nan nakaskasdaaw ay nangpaligat isnan alin di Egipto ya isnan kaipoipogawna tay gintekmo din nangpalpaligatanda isnan ipogawmo. Et gapo isnan naay inikkam et naipangato nan ngadanmo ay enggana id wani.

¹¹ Sik-a gedan nan nangpasiyan isnan danom nan Gadangdang ay Baybay ta mendaan nan ipogawmo isnan namagaan ay lota dakapay limonen nan mangkedkedag ken daida ay kaneg nan ommat isnan bato no maekdag isnan adaadaem ay danom.

¹² Et isnan kag-aw et inpangpangom daida isnan napoponok ay andoando ay liboo dat isnan labi et isnan apoy ta sisilawana daida isnan mendad-aananda.

¹³ Ginomwabka pay isnan bilig ay Sinai dakat nakitoya isnan ipogawmo isnan nangidyam isnan gawis ay bilbilinmo ya isnan ostoosto ay insolsolom.

¹⁴ Inpagtekmo ken daida nan kapateg nan agew di illeng ta patgenda ya inidyam ken Moses ay baam nan bilbilinmo ay pala ken daida.

¹⁵ Isdin pay naowatanda et inagtam daida is tinapay ay nagapo id daya ya isdin naewewanda et inagtam daida is danom ay nagapo isnan bato. Ya inbagam ken daida en omeyda isnan daga ay inkalim en idyam ken daida ta menkowada.

¹⁶ Ngem linmastog ya sinmokil din alal-apomi ya inadyanda ay mangtongpal isnan bilbilinmo.

¹⁷ Inadyanda ay mangtongpal ya kinalingkinganda din nakaskasdaaw ay inik-ikkam. Et gapo isnan lastogda et ninpilida is ap-apoda ay mangisagong kano ken daida id Egipto ta olay kasinda mabab-aa. Ngem sik-a nan Dios ay managpakawan, managseg-ang, managlayad ya bakenka nalaka ay makaliget isonga egaymo binaybay-an daida

¹⁸ ay olay no inomsetda pay is kaneg baka ay sinangdidios dadapay kanan en siya nan dios ay nang-ikaan ken daida id Egipto. Aye pay di inkanda ay ninkalkali is ngawi ken sik-a.

¹⁹ Ngem egaymo kayet tinaytaynan daida isnan pondag gapo isnan dadama ay seg-angmo ken daida ya egaymo kinak-aan san liboo wenno san apoy ay nang-it-itdo ken daida isnan daanda isnan kag-aw ya labi.

²⁰ Isnan kinagawismo et inpagtekmo kayet ken daida nan masapol ay ikkanda dakapay pinakan daida is mana ya inagtam daida is danom ay inomenda.”