Nehemias 8 - Kalin Apo Dios

Nan Nang-ibasaan Ezra Isnan Linteg 8:1-10 ; 9:1a , 5-20

¹ Isnan maikapito ay bowan et mentetee et nan Israelita isnan il-ilida. Dat isnan omona ay agew san deey ay bowan et nadagopda ay Israelita id Jerusalem isnan sag-en nan talangka ay nginadnanda is Talangkan di Danom. Dadat ibaga ken Ezra ay esay padi ay men-isolsolo isnan linteg ta alaena nan naisolatan di linteg Moses ay inidyan nan apo isnan Israelita.

² Dat alaen Ezra nan naisolatan di linteg dat omey isnan kad-an di nadadagop ay aamam-a ya iinin-a ay maitapi nan oongong-a ay makaawat isnan maibagbaga.

³ Dodokogan Ezra san Talangkan di Danom danapay ibasa ken daida nan linteg. Inlogina ay ninbasa isnan wakgawakgat et enggana isnan kag-aw et am-in san ipogaw et inpapasnekda ay nindedenge.

⁴ Issan menbasbasaan Ezra et intatakdegna isnan naipatang ay naididiplat ay tabla ay naisapo pala issan agew ay deey ay madagopanda dapay abes wada isnan makanawana da Mattias, Sema, Anaias, Urias, Hilkias ya si Maaseyas. Dat isnan kanigidna et tomatakdeg abes da Pedayas, Misael, Malkija, Hasum, Hasbaddana, Zacarias ya si Mesullam.

⁵ Nintakdeg si Ezra isnan tabla ta mailan am-in nan ipogaw siya. Dat idi bilagena san naisolatan di linteg dat tomakdeg am-in san ipogaw.

⁶ Dat kanan Ezra en, “Madaydayaw nan apo ay kangatowan ay Dios.” Dat ingaton am-in nan deeyday ipogaw nan ledengda dadapay kanan en, “Sapay koma” dadat menlokbob ay mendayaw.

⁷ Dadat kasin tomakdeg et ipalawag nan naayda ay Levita ay da Jesua, Bani, Serebias, Jamin, Akkub, Sabbetai, Hodias, Maaseyas, Kelita, Azarias, Jozabad, Hanan ken Pelias nan linteg ken daida.

⁸ Inbasada nan linteg dadapay ipalawag nan kayatna ay kanan tapno maawatan nan deeyday ipogaw.

⁹ Isnan nangdengan san kaipoipogaw issan naibasa ay linteg et nin-agada. Isonga dat kanan Nehemias ay gobilnadol, ya si Ezra ay padi ay men-isolsolo isnan linteg ya nan Levita ay nang-ipalawag isnan linteg en, “Napateg nan naay agew isnan apo ay Diosyo isonga adi kayo koma men-ag-aga ya menseseg-ang.

¹⁰ Somaa kayo bawet ta men-gasgasing kayo. Agtanyo is makan ya mainom nan maid saganada tay nan naay agew et napateg isnan apo ay Diosyo isonga adi kayo menseseg-ang tay nan gasing nan apo nan mangpapigsa ken dakayo.”