Mikias 6 - Kalin Apo Dios

¹ Kanan Mikias en, “Dakayo ay Israelita, dengngenyo nan mangpabasolan nan apo ken dakayo. Ibagan et nan apo nan dalomna ta dengngen nan bilbilig nan kanana.

² Dengngenyo ay bilbilig ya dakayo gedan ay pegnad di batawa nan dalom nan apo tay wada nan dalomna maipanggep nan ipogawna ay Israelita.”

³ Dat kanan nan apo en, “Dakayo ay ipogawko, ay ngan di inikkak ken dakayo? Ay naoma kayo ken sak-en? Kadya somongbat kayo.

⁴ Inkaanko dakayo id Egipto et nawayaan kayo isnan nabab-aanyo isdi. Inpaeyko pay da Moses, Aaron ya si Miriam ay mangipangpango ken dakayo isdin kinmaananyo isdi.

⁵ Nemnemenyo pod din ngawi ay ikkan koma Balak ay alin di Moab ken dakayo. Tay kanana ken Balaam ay anak Beor en baosena dakayo ngem dat kanan Balaam en adi mabalin tay nan gawis et kedeng nan ikkan nan apo ken dakayo. Nemnemenyo gedan din nangbadbadangak ken dakayo isdin mendad-aananyo ay kawad-anyo id Acacia ay menpaey id Gilgal. Nemnemenyo am-in dana tapno manggetkanyo isdin inikkak ay nang-isalakan ken dakayo.”

⁶ Ay esayo kanan en, “Ngan pay di igasingko isnan apo ay Dios id daya no omeyak ay mendayaw ken siya? Ay nan kagawisan ay koyaw di baka ta mapoowan nan maigasing ken siya?

⁷ Ay men-gasing ngata nan apo no omiyeyak ken siya is kalibolibo ay kalnilo wenno men-ay-ayos ay lana ay adi kaam-am-amin? Ay idatonko nan iyon-a ay anakko ta mangbayad isnan basbasolko?”

⁸ Adi, tay inbagan nan apo nan gawis ay ikkan tako et siya na. Ikkan tako nan osto datakopay ipaila nan layad ya seg-ang tako ya menpakombaba tako ay mangtongtongpal ken Apo Dios.