Mikias 3 - Kalin Apo Dios

⁵ Kinwanin Mikias en, “Naay nan kanan nan apo maipanggep nan mamadto ay mang-al-allilaw isnan ipogawna. Ikalida en wada nan lamnin isnan menbaybayad ken daida dadapay eg-egyaten nan tapin di ipogaw ay mangmangwani en waday omal-ali is gobat isnan adi menbayad ken daida isonga kanan nan apo ken daida ay mamadto en,

⁶ ‘Dakayo ay mamadto et nganngani ay makwas nan ik-ikkanyo ay men-ipadpadto ya maid et menpalpalikna ken dakayo is menpadtowanyo ya adi kayo polos makaibaga et isnan awnit ommat.’

⁷ Nan mang-ipadto isnan awnit ommat et maibabainda tay adi tomet-ewa nan ibagbagada. Awnit pilmi ay mabainanda tay adi ikaskason Apo Dios daida.”

⁸ Dat itoloy Mikias ay mangwani en, “Ngem sak-en et liknaek nan Ispiriton nan apo ya nan panakabalina. Ipagtekna gedan ken sak-en nan nalinteg ay maikkan danapay patoleden sak-en ay mang-ibaga isnan Israelita isnan basbasolda.

⁹ Dengngenyo sak-en, dakayo ay mentotolay isnan Israelita, dakayo ay mang-adyan isnan osto ya mangpangawi isnan nalinteg.

¹⁰ Pilmi nan ikkanyo tay isnan mangpasaadanyo isnan ilin Apo Dios ay Jerusalem et baken kayo nalinteg isnan iib-ayo ya olay pay no menpatey kayo.

¹¹ Nan mentotolay isnan ili et ikkanda et kedeng nan osto ay oblada no mapasoksokanda. Nan papadi et adida menpalawag isnan linteg malaksig no malagbowanda ya nan mamadto et menpabayadda isnan mang-ibagaanda isnan naipagtek ken daida. Ik-ikkanda di dapay kankananda en, ‘Maid ommat ken dakami tay wada nan apo ken datako.’

¹² Isonga gapo isnan ik-ikkanyo et awnit mabakas am-in ay bab-aey id Jerusalem et menbalin ay kaneg om-a. Dapay abes nan bilig ay kad-an di Templo et awnit menbalin kasin is pagpag tay maiwed polos mabay-an.