Levitico 19 - Kalin Apo Dios

Nan Tap-in Di Bilin Apo Dios 19:1-2 , 9-18

¹ Dat ibagan nan apo ken Moses ta

² kanana na isnan Israelita en, “Masapol ay maid polos kangawiyo tay sak-en ay apo ay Diosyo et maid polos kangawik.”

⁹ “No aniyenyo nan payewyo et adiyo komkompayen nan pagey isnan bengetna ya adiyo sagsagongen ay mangkompay isnan pagey ay nabay-an.

¹⁰ Adi kayo somagsagong isnan kad-an di es-esek ay mang-al-ala isnan nabay-an wenno mangpidit isnan naekdag. Ibay-anyo pala isnan kodo ya pala isnan sangaili. Sak-en nan apo ay Diosyo.

¹¹ Adi kayo men-ak-akew wenno mensos-owitik wenno menkamkampot.

¹² Adiyo os-osalen nan ngadanko ay mensapata no nenemnemenyo ay adiyo tongpalen nan isapatayo tay maibabain nan ngadanko. Sak-en nan apo ay Diosyo.

¹³ Adiyo osalen nan ib-ayo isnan menkatagoyo gapo tay maid kabaelanda wenno ak-akewan daida. Adiyo iyawniawni is olay esa ay labi nan lagbon nan pinaoblayo.

¹⁴ Adiyo saysayoten nan toweng wenno ses-eyatan nan daanen nan kowap ta adi maisagaw. Patiyenyo sak-en tay sak-en nan apo ay Diosyo.

¹⁵ Masapol ay ostoosto nan ikkanyo isnan mangbanaganyo isnan ib-ayo ta adiyo paam-amden nan esa gapo tay kodo wenno baknang.

¹⁶ Adi kayo menkalkali is baken tet-ewa isnan ib-ayo. No waday mabanag dat tetey nan dosana et komali koma nan testigo ta baleng pay makabadang nan ibagana. Sak-en nan apo.

¹⁷ Adiyo liligten nan ib-ayo nodi makitoya kayo ay gawis ken daida tapno men-gayyem kayo tapno adi kayo menbasol gapo ken daida.

¹⁸ Adi kayo men-ibab-aes wenno itotoloy ay mangliliget isnan ib-ayo nodi laylaydenyo daida ay kaneg nan pananglayadyo isnan awakyo. Sak-en nan apo.”