Josue 24 - Kalin Apo Dios

¹ Isnan namingsan et inpadagop Josue nan Israelita id Sikem danat ipaayag am-in nan aamam-a, nan men-ipangpango, ya nan am-in ay menlelebbeng ta menpailada isnan pagdaydayawan ken Apo Dios.

² Dat kanan Josue isnan deeyday ipogaw en, “Siya na nan kinwanin nan apo ay Dios di Israelita, ‘Id kasikasin et nintee din alal-apoyo ay naitapi din si Tera ay aman da Abraham ken Nahor isnan bas-ang nan Ginawang ay Eufrates et nakidaydayawda isnan sinangdidios.

^3a Daket ikaan nan alapoyo ay si Abraham isnan kad-anda isnan bas-ang di Ginawang ay Eufrates et ipangok isnan dagan di Canaan dakpay paadowen nan aap-ona.’ ”

¹⁴ “Isonga id wani et patgenyo nan apo ya mensilbi kayo ken siya isnan am-in ay kabaelanyo. Dokoganyo nan sinangdidios ay dinaydayaw din alal-apoyo ya am-ayo id Mesopotamia ya id Egipto ta kedkedeng nan apo is silbiyanyo.

¹⁵ No adiyo kayten ay mensilbi isnan apo et menpili kayo id wani no sino nan silbiyanyo. Ay silbiyanyo nan sinangdidios ay dinaydayaw din alal-apoyo isdin kawad-anda id Mesopotamia wenno nan dios di Amorreos ay akindaga isnan Canaan ay menteteanyo id wani. Ngem sak-en pay ya nan pamilyak et nan apo nan mensilbiyanmi.”

¹⁶ Dat kanan nan kaipoipogaw en, “Adimi polos taytaynan nan apo ta mensilbi kami isnan teken ay dios

¹⁷ tay nan apo ay Dios tako et siya nan nangikaan ken datako ya din napowan tako isdin nabab-aan tako id Egipto. Siya pay gedan nan nang-ik-ikkan isnan kaskasdaaw ay inil-ila tako ya sinalsalaknibana datako isnan am-in ay inmay-ayan tako ya isnan il-ili ay dinad-aan tako.

¹⁸ Et isnan om-omdanan tako isnan naay ay daga et pinakaan nan apo nan Amorreos ya nan tap-in di ipogaw ay nintetee isna. Isonga olay dakami et mensilbi kami abes isnan apo tay siya et kedeng nan Dios tako.”

¹⁹ Ngem dat kanan Josue issan kaipoipogaw en, “Ngem dakayo et waay adi kayo makasilbi isnan apo tay siya et manakabalin ya manag-imon ay Dios et adina pakawanen nan basbasolyo.

²⁰ Isonga no taynanyo siya ta mensilbi kayo isnan sinangdidios et makaliget ken dakayo et dosaena dakayo engganay maamin kayo ay olay no gawigawis din inik-ikkana ken dakayo id kasin.”

²¹ Dadat kanan ken Josue en, “Baken sa, kaytenmi met a ay mensilbi isnan apo.”

²² Dat kanan Josue ken daida en, “Dakayo ngalod mismo nan mangpaneknek isnan nangpiliyanyo ay mensilbi isnan apo.” Dadat kanan en, “Owen, paneknekanmi.”

²³ Isonga dat kanan Josue en, “Ala ngalod iwasityo et nan sanada ay sinangdidios ta kedkedeng nan apo ay Dios di Israelita is silsilbiyanyo.”

²⁴ Dadat kanan ken Josue en, “Mensilbi kami isnan apo ay Dios tako ya tongpalenmi nan bilbilina.”

²⁵ Isonga issan deey ay agew ay kawad-anda id Sikem et si Josue nan nangitakdeg ay makitolag ken Apo Dios pala isnan deeyday ipogaw danat idya ken daida nan linteg ya bilbilin Apo Dios ay tongtongpalenda.