Jonas 4 - Kalin Apo Dios

Nan Liget Jonas Ya Nan Seg-ang Apo Dios 4:1-11

¹ Ngem si Jonas pay et egay nagasingan daet makaliget gapo isnan naay inikkan nan apo.

² Danat kanan, “apo, ay egayak kinwani isdin esakpay komaan id baey ay siya na nan awnitmo ikkan isonga inkakamok et tomagtagak ay omey id Espania? Getkek ay managlayadka ya managseg-angka ay Dios, naanos ya kanayon ay nakasaganaka ay mangbaliw isnan ninemnemmo ta adika mendosa.

³ Isonga id wani apo, ipalobosmo ngalod ay mateyak tay gag-awis pay ay mateyak mo nan matatagowak.”

⁴ Dat kanan nan apo en, “Dakan aped makaliget?”

⁵ Dat omey si Jonas isnan bandan di balaan di agew isnan ili dat somapo is linongna danat itokdo issan malilinongan ay menseed ta ilaena no ngan nan ommat id Nineve.

⁶ Dat patobowen nan apo ay Dios nan esay mola ay manglinong ken Jonas ta adi kaagewan. Et pilmi ay nagasingan si Jonas issan mola.

⁷ Ngem kawakgatana dat ngetngeten di gege san poona et malaylay tay si Apo Dios nan nangipaikkan.

⁸ Idi makagkag-aw ay epdas binmala nan agew dat omipaey si Apo Dios is menpoos ay dagem ay nagapo isnan balaan di agew et nganngani pay maolaw si Jonas isnan pilmi ay poos isonga dat mendawat ay mangwani en, “Gawgawis pay et ay mateyak mo nan matatagowak isnan kaneg tona.” Tay kaytena ay matey.

⁹ Ngem dat kanan nan apo en, “Ngan di kalebbengam ay aped makaliget isnan inommat isnan esek?” Dat kanan Jonas, “Owen, lebbengna ay makaligetak. Olay pay siyay gapo is mateyak.”

¹⁰ Ngem dat kanan Apo Dios en, “Dakan aped kolkolen nan nemnemmo panggep laeng nan naay esek dapay aped tinmobo isnan esay labi dat mamaid isnan maisned ay labi ay maid ninbanogam?

¹¹ Isonga am-am-amedak adi koma is maseg-ang id Nineve ay napateg ay ili ay kad-an di nasolok ay singgasot et dowampoo ay libo ay kan-egda oongong-a tay maid pay laeng getkenda ya wada pay nan adoado ay talakenda.”