Jonas 3 - Kalin Apo Dios

Nan Mangtongpalan Jonas Isnan apo 3:1-10

¹ Dat kasin makikali nan apo ken Jonas

² et kanana en, “Enka id Nineve ay dakkel ay ili ta ibagam isnan ipogaw isdi nan inpagtekko ken sik-a.”

³ Daet tongpalen et Jonas nan apo et omey id Nineve. Nan Nineve et annaanawa ay ili isonga tolo ay agew nan nangsolsolana.

⁴ Isnan damo ay agew ay nangsolsolan Jonas isnan deey ili ay mangmangwani en, “Isnan epatpoo ay agew et awnit mabakas nan Nineve,”

⁵ et pinatin nan iNineve nan inpabagan Apo Dios isonga ninemnemda ay mentepeda am-in. Ya am-in nan ipogaw isdi ay menlogi isnan kababaan et enggana isnan kapapatgan et ninbado is sako ay mangipaila en menbabawida.

⁶ Isnan nangdengan nan ali id Nineve isnan naay danat taynan nan tokdowana danapay kaanen nan gawigawis ay badona ta menbado is sako danat itokdo isnan dapo.

⁷ Danat ipabaga isnan ipogaw id Nineve en, “Naay nan bilin nan ali ya nan oopisyalisna: Masapol ay adi kayo mangmangan. Maiyadi nan manganan ya ominoman nan am-in ay ipogaw, baka ya kalnilo.

⁸ Am-in nan ipogaw et masapol ay menbadoda is sako ya sako gedan nan aplag di talaken. Masapol ay ipasnekyo ay menlowalo ken Apo Dios dayopay isaldeng nan ngawi ay ogaliyo ya ngawi ay ik-ikkanyo.

⁹ Baleng pay balbaliwan Apo Dios nan ninemnemna ta adi et makalkaliget ken datako ta adi tako matey.”

¹⁰ Inilan Apo Dios nan inikkan nan iNineve. Inilana ay dinokoganda nan ngawi ay ogalida isonga danat sokatan nan nemnemna et egayna et dosaen daida ay kaneg nan kinwanina.