Jonas 2 - Kalin Apo Dios

Nan Lowalon Jonas 2:1-10

¹ Isnan kawad-an Jonas isnan eges di ikan et ninlowalo isnan apo ay Diosna ay mangwani en,

² “Isnan ligatko et inayagak sik-a apo et nang-idngeka. Owen, issan matmateyak et nin-adawagak ken sik-a et inidngem sak-en.

³ Inpatep-am sak-en isnan baybay ay kad-an di napigsa ay dalloyon et masapsapowakanak daket maonog isnan kaadaemana.

⁴ Kanak pay no naipakaanak et isnan kad-am et adiyak et kasin il-ilan nan napateg ay Templom.

⁵ Nalin-ebak isnan danom et map-osanak. Nalingbanak isnan baybay dapay kobotan nan logam di baybay nan olok.

⁶ Naipeyak isnan ostoosto ay poon di bilig isnan daem nan batawa ay nan segpana et naidakig ay adiyet kalokatan ta maid makabala. Ngem sik-a ay apo ay Diosko et insalakanmo sak-en isnan daemna isonga daanak ay matmatago.

⁷ Idi naliknak ay matmateyak et daket menlowalo ken sik-a ay apo et isnan napateg ay Templom, inidngem sak-en.

⁸ Nan mendaydayaw isnan maid silbina ay tinagtago et dinokoganda nan badangmo ken daida.

⁹ Ngem sak-en et menday-engak ay mangdaydayaw ken sik-a. Men-idatonak ken sik-a ya ikkak nan inkalik. Kedkedeng nan apo is makaisalakan.”

¹⁰ Dat bilinen nan apo nan ikan ta ipabalana si Jonas isnan benget di baybay.