Jonas 1 - Kalin Apo Dios

Nan Adi Mangtongpalan Jonas Isnan apo 1:1-17

¹ Isnan esay agew et nakikali nan apo isnan esay lalaki ay si Jonas ay potot Amittai.

² Kinwanina en, “Omeyka isnan dakkel ay ili ay Nineve ta ibagam en awnitko bakasen nan deey ay ili tay getkek nan kangawin nan ipogaw isdi.”

³ Dat menlobwat si Jonas ngem teken nan ninpaeyana ta itagtagana koma nan apo. Inmey id Joppe et das-ana nan bapol ay menpaey id Tarso ay ili id Espania. Binayadana nan pilitina daet makilogan issan bapol ay omey id Espania tapno omaddawi isnan apo.

⁴ Ngem dat ipaey nan apo nan napigsa ay dagem issan baybay et menlemlem is napinapigsa et kanega madadael nan bapol.

⁵ Inmegyat nan men-ob-obla issan bapol et wasdin menpabadang isnan diosna dadapay itep-a nan kalgada isnan baybay tapno yomap-ew nan bapol. Dapay si Jonas et wada isnan baban di bapol ay nangipopodan ay naimayeng isnan seyepna.

⁶ Dat omey nan kapitan di bapol ken siya et kanana, “Dakan aped maseseyep? Bomangonka adi ta menpabadangka gedan isnan diosmo ta baleng pay seg-angana datako ta adi tako matey.”

⁷ Dat kanan san men-ob-obla isnan bapol en, “Menbinonot tako ta ilan tako mo sino nan mapabasol isnan naay mapaligatan tako.” Dadat ikkan et nabonot nan ngadan Jonas.

⁸ Dadat kanan ken siya en, “Id wani, ibagam no sino nan mapabasol isnan naay. Dakan od wada isna? Into nan ilim? Ay ngan nan kaipogawmo?”

⁹ Dat kanan Jonas, “Esaak ay Hebreo. Mendaydayawak isnan apo ay Dios id daya ay nangboliw isnan daga ya nan baybay.”

¹⁰ Danat itoloy ay mang-ibaga en itagtagtagana nan apo. Isnan nangdengan nan mentetee isnan bapol isnan kinwanin Jonas dadat inmegyat dadapay kanan, “Ay inayan, kaeegyat nan inikkam.”

¹¹ Dapay dat omam-amed pomigsa nan lemlem isonga dadat sooten en, “Ngan pay ngalod di ikkanmi ken sik-a ta somaldeng nan naay lemlem?”

¹² Dat kanan Jonas, “Mang-itep-a kayo ngalod isnan baybay ta somaldeng na tay getkek ay sak-en nan nakagapo isonga nalemlem kayo.”

¹³ Ngem dat kayet ipapatin san wada isnan bapol nan kabaelanda ay mang-ipaigid issan bapol ngem adida mabaelan tay dat pomigsa da pomigsa nan dagem.

¹⁴ Dadat men-adawag isnan apo ay mangwani en, “O Apo, adim koma dosdosaen dakami is tetey gapo isnan mangpateyanmi isnan naay ipogaw. Sik-a apo nan kigad isnan naay om-ommat tay sik-a nan mang-ipagtek isnan osto ay ikkanmi.”

¹⁵ Dadat lak-eyen si Jonas et itep-ada isnan baybay dat dagos ay sinmaldeng nan lemlem.

¹⁶ Gapo isnan naay et nan wada isnan bapol et inmegyaegyatda isnan apo dadat men-ibon-ong ken siya dadapay isapata ay mensilbi ken siya.

¹⁷ Dat isnan bilin nan apo et inoklong di dakedake ay ikan si Jonas et nintetee isnan eges san ikan is tolo ay agew ya labi.