Joel 2 - Kalin Apo Dios

Nan Omaliyan Di Kadodododon 2:1-2

¹ Mentanggoyob kayo id Sion, ay napateg ay bilig Apo Dios ta ipagtekyo nan kaeegyat ay awnit ommat. Pomayegpeg kayo ay iJuda tay nganngani nan men-okoman nan apo.

² Awnit menbolinget ya kasasadot nan deey ay agew tay pilmi ay menliliboo et bomobolinget. Omal-ali nan adoado ay dodon et pabolingetena nan bilbilig. Maid kankanegna id kasin ya awnit maid kankanegna kasin.

Masapol Ay Menbabawi Nan Ipogaw Apo Dios 2:12-17

¹² Kankanan nan apo en, “Ngem olay id wani et somagong kayo ken sak-en ay menbababawi, menteptepe ya men-ag-aga.

¹³ Ipailayo nan seg-angyo isnan ik-ikkanyo tay adi omanay nan mangsingsingatanyo isnan badbadoyo is mangipaila. Somagong kayo isnan apo ay Diosyo tay naanos ya managseg-ang siya. Maan-anosana dakayo danapay tongpalen nan inkalina. Kanayon ay nakasagana ay mangpakawan ken dakayo ay adi mendosa.

¹⁴ Sinoy mangtek? Baka sokatan nan apo ay Diosyo nan nemnemna danat seg-angan dakayo danapay agtan dakayo is adoado ay maapit et makaidaton kayo kasin ken siya is pagey ya basi.

¹⁵ Mentanggoyob kayo isnan bilig nan Sion ta ibilinyo ay mentepeda dakayopay ibaga en madagopda.

¹⁶ Dagopenyo am-in nan ipogaw ta isaganayo daida ay men-gimong. Ayaganyo nan naeteng dayopay dagopen nan oongong-a ya olay gedan nan engnga. Olay nan kaas-asawa et masapol ay taynanda nan baeyda ta makigimongda.

¹⁷ Nan papadi ay mensilbi isnan apo isnan ninbaetan di altar ya nan segpan di templo et masapol ay men-agada ay menlowalo en, ‘apo, seg-angam kad nan ipogawmo. Adim koma ipalobos ay iiyawen ya selselaten nan tap-in di il-ili dakami ay mangmangwani en, “Into pay od nan Diosyo?” ’ ”

Nan Kasin Mangpagawisan Apo Dios Isnan Ipogawna 2:21-32

²¹ “Dakayo ay paypayew, adi kayo omegyat nodi men-gasing kayo ya menlagsak kayo gapo isnan am-in ay inikkan nan apo ken dakayo.

²² Dakayo ay talaken, adi kayo gedan omegyat tay nan pagpastolan et ado nan logam. Nan kak-aiw et bomgasda ya adoado nan begas nan kaiw ay makwani en higos ya olay nan obas.

²³ Men-gasing kayo ay iJerusalem. Menlagsak kayo gapo isnan inikkan nan apo ay Diosyo ken dakayo. Inidyana nan ostoosto ay damo ay odan Tay pinaodana isnan pinag-odan ya isnan tiagew ay kaneg id kasin.

²⁴ Nan kiskisan et mamapnoda is pagey ya nan mataytayaan di malebek isnan paglebkan et menlosoyda is lana ay magapo isnan olibo ya is basi.

²⁵ Isagongko din namaid ken dakayo isdin timpo ay kinan am-in di dodon nan apityo tay sak-en din nang-ipaey isnan naayda ay nangdadael isnan molayo.

²⁶ Ngem awnit wada nan adoado ay kanenyo ta mapnek kayo dayot dayawen nan apo ay Diosyo ay nangikkan isnan naayda ay kaskasdaaw pala ken dakayo. Et dakayo ay ipogawko et adi kayo kasin maiiyaw.

²⁷ Awnit getkenyo ay Israelita ay wadaak ken dakayo ya sak-en nan apo ay Diosyo et maid teken is dios. Awnit adi kasin maiiyaw nan ipogawko.

²⁸ Makwas pay di daket ibokbok nan ispilitok ken dakayo am-in. Et awnit ipagtek nan an-akyo ay lalalaki ya bababai nan kalik. Nan aamam-ayo et awnitda iitawen nan gawis ay ommat ya nan bababalloyo et wada nan ipailak ken daida.

²⁹ Isnan deey ay timpo et awnitko ibokbok nan ispilitok isnan am-in ay olay isnan baa ay lalalaki ya bababai.

³⁰ Isnan deey ay agew et awnitak omipaila isnan daya ya isnan batawa is kaskasdaaw ay sinyal dat men-ayos nan basa ya wada nan poo ya bomolinget is asok.

³¹ Awnit bomolinget nan agew et awnit gomadangdang nan bowan ay kaneg basa esapay omali nan napateg ya kaeegyat ay agew nan apo.

³² Ngem am-in ay menpabadang isnan apo et awnit maisalakan ay kaneg nan kinwanina en, ‘Nan tap-in di iJerusalem et awnitda mailisi isnan kaeegyat ya nan pinilik et awnitda matago.’ ”