Job 38 - Kalin Apo Dios

¹ Dat makanali nan apo ken Job isnan dalipospos et kanana en,

² “Ay sinoka ay maid nemnemna ay menkalkali is maid silbina?

³ Ipailam nan kinasilibmo ta songbatam nan sootko.

⁴ Ay wadaka od isdin nangboliwak isnan batawa? Ala, no met laeng adoado nan getkem ibagam ngalod ken sak-en.

⁵ Sino nan nangnemnem is kadakdak-ena ya sino nan nanglokod is kaan-andona? Ay getkem met laeng am-in nan songbat datona?

⁶ Ngan nan mangtetengel isnan pegnad nan lota? Ay sino nan nangippey isnan tokod nan batawa?

⁷ Et isnan deey ay agew et ninday-eng nan taltalaw di tan-o dapay men-galalasing nan adi kaila ay wada id daya.

⁸ Ay sino nan mangtetena isnan binmalaan nan baybay isnan lota ta adi lomosoy isnan batawa?

⁹ Sak-en nan nanglingeb isnan baybay is liboo dakpay pabolingeten.

¹⁰ Sak-en gedan nan nangbeddeng isnan baybay ta adi lomosoy.

¹¹ Daket kanan en, ‘Isna et kedeng nan patenggam. Siya na nan patenggan nan dadadadakke ay dalloyonmo.’

¹⁶ Ay nakaeyka isnan menbala isnan daem di baybay? Ay dinad-aanmo nan kaaadaemana?

¹⁷ Ay inilam et nan menpaey isnan menbolinget ay batawan di natnatey?

¹⁸ Ay nanemnemmo met laeng nan kadakdak-en nan batawa? Kadya, songbatam sak-en no getkem met laeng dana.”