Job 14 - Kalin Apo Dios

14:1-14 ; 19:23-27 38:1-11 , 16-18 42:1-6

¹ Naay nan kinwanin Job isnan apo. “Am-in nan ipogaw et naiyanakda ay nakapsot dadapay maligligatan ya apti-aptik nan biyagda.

² Siawyan nan masiknanda dadat malegey ay kaneg nan malaylayan di bayaya. Owen, siawyan dadat mamaid ay kaneg nan mamaiddan di alin-ew.

³ Olay no kaneg todi nan biyag di ipogaw, ay sik-a apo et mangbanagka kayet?

⁴ Maid gawis is magapo isnan ipogaw tay ngawida am-in.

⁵ Nan kaan-andon nan biyag di ipogaw et epdasmo ninemnem et nabibilang nan bowan ay matatagowana ya epdasmo bineddengan et adi et mabalin ay masokatan.

⁶ Isonga adim et il-ilaen siya dakapay baybay-an ta ganasena nan biyagna ay olay no naligat engganay matey.

⁷ No nenemnemen tako nan kaiw ay mapoyo et wada nan mabalina tay pomngi kasin dat lomamot.

⁸ Olay no maeteng nan lamotna ya matey nan poona

⁹ ngem no masibogan et kasin pomngi ay kanega katobtobo ay mola.

¹⁰ Ngem nan ipogaw pay et matey dat maikaob. Owen, matey et maidet.

¹¹ Isnan matdokan nan posong ya ginawang isnan tiyagew et mamaid nan danomna

¹² et siya di nan kaneg nan ipogaw tay no matey et adiyet kasin bomangon. Owen, adi et magido engganay daan pay laeng nan daya.

¹³ Igagom kad sak-en isnan kad-an di natey ta lingbam sak-en ay enggana ay mabaew nan ligetmo. Ngem adim kalkalingkingan nan timpo ay mangnemnemam kasin ken sak-en.

¹⁴ Ay no matey nan ipogaw ay mabalin ay kasin matago? Siya na nan sesed-ek ay timpo tapno mawayaanak isnan naay ligatko.”