Jeremias 7 - Kalin Apo Dios

¹ Dat bilinen nan apo si Jeremias et kanana en,

² “Enka isnan pantew di Templo ta kanam en, ‘Dengngenyo nan kankanan nan apo dakayo ay makwani en Juda ay omali mangdayaw.

³ Nan manakabalin ay apo ay Dios di Israelita et kanana en pagawisenyo nan ik-ikkanyo ya ogaliyo tapno ipalobosko ay mentee kayo isnan naay daga.

⁴ Adiyo patpatiyen nan kampot ay kankananda ay gapo tay wada nan Templon Apo Dios isna et maid ngawi is ommat ken dakayo.

⁵ Ngem no pagawisenyo nan ik-ikkanyo ya nan ogaliyo ta nan osto nan ikkanyo isnan wasdin esa ken dakayo

⁶ ya no isaldengyo ay mang-am-amis isnan sangaili, ngoso ya nan balo ya adi kayo menpatpatey isnan maid basolda ya isaldengyo ay mendaydayaw isnan sinangdidios ay mangipangawi ken dakayo

⁷ et pateeek dakayo isnan naay daga ay inidyak isdin alal-apoyo ay kowada ay eng-enggana.

⁸ Ngem dakayo et nan patpatiyenyo et san kankananda ay kampot ay maid silbina

⁹ dakayopay men-akew, menpatey, makikamkamolala, menkampot isnan mensapataanyo, menpalti ay men-idaton ken Baal ya daydayawenyo nan dios ay egayyo gin-gintek id kasin.

¹⁰ Ay itoltoloyyo kayet ay mang-ik-ikkan isnan naayda ay kaliligetko dakayopay omali isnan Templok dakayot kanan en maid ommat ken dakayo tay wada kayo isnan Templo.

¹¹ Ay isnan pangiil-anyo et pagsowitikan nan Templok? Getkek tay mismo ay inilak nan ik-ikkanyo.

¹² Enkayo id Silo ay damo ay pinilik ay madaydayawak ta ilaenyo nan inikkak ay nangbakas isnan deey ay ili gapo isnan basbasol din alal-apoyo.

¹³ Et id wani gapo tay inikkanyo am-in nan naayda ay kinwanik ay basol et olay no makikalkaliyak ken dakayo et adyanyo ay mangdenge ya adiyo ikaskaso nan mang-ay-ayagak ken dakayo

¹⁴ isonga ikkak isnan naay Templok ay patpatgenyo ya isnan naay ili ay inidyak isdin alal-apoyo ya ken dakayo din inikkak isnan ili ay Silo id kasin.

¹⁵ Awnitak pakaanen dakayo isnan pang-iilaak ay kaneg san nangpakaanak isnan kakabagyanyo ay Israelita ay aap-on din si Efraim.’ Sak-en ay apo nan ninkali.”