Jeremias 31 - Kalin Apo Dios

⁷ Kanan nan apo en, “Menkanta kayo ay men-gasgasing dakayo ay Israelita tay dakayo nan kapatgan isnan am-in ay ipogaw. Ikantayo nan mangdaydayawanyo ta kananyo en, ‘Insalakan nan apo nan nabay-an ay ipogawna.’

⁸ Ipasagongko daida am-in ay wada isnan solsolin nan batawa. Makkey ken daida nan kowap ya nan pilay, nan maliliton ya nan nganngani ay omanak et awnitda adoado ay somagong.

⁹ Awnit men-ag-aga nan ipogawko ay somagong dakpay liwliwaliwen daida isnan mang-isagongak ken daida. Awnitak ipango daida isnan sag-en di danom. Ipangok gedan daida isnan mendawes ay daan ta adida maisogsogto tay sak-en nan aman di Israelita et si Efraim nan iyon-ada.

¹⁰ Dengngenyo sak-en, dakayo ay baken Israelita ta ipagtekyo nan ibagbagak isnan anaddawi. Inwakatko nan ipogawko ngem awnitak olnongen daida ta ayowanak daida ay kaneg nan ikkan di menpaspastol isnan ipastolna.

¹¹ Winayaak nan ipogawko daket soboten daida isnan kabaelan di ipogaw ay napigsa mo daida.

¹² Isonga awnitda omali ay menkanta id Jerusalem is gasingda. Awnitda malagsakan isnan gawis ay magapo ken sak-en ay kaneg nan pagey, mainom ya lana ya isnan kalnilo ya baka. Gawigawis nan biyagda ay kaneg nan om-a ay mamas-et ay masibsibogan ya adida et menseseg-ang.

¹³ Awnit mensala nan bababai is gasingda ya men-gasing gedan nan lalalaki. Sokatak nan seg-angda is gasing dakpay liwliwaliwen daida ta mamaid et nan seg-angda.

¹⁴ Gapo isnan gawis ay idatdaton nan ipogawko ken sak-en et awnit mamapnek nan papadi is mam-is ay makan dakpay penneken gedan nan ipogawko is am-in ay masapolda. Sak-en ay apo nan ninkali.”

¹⁵ Dat kasin kanan nan apo en, “Wada nan mamadnge ay men-ag-aga id Rama. Agan Raquel ay ag-agaana nan aan-akna tay nateyda am-in. Adi polos kaayak.

¹⁶ Ngem daket kanan, ‘Isaldengmo nan agam ya ponasam nan matam tay awnit wada nan ganabem isnan am-in ay ligatmo. Awnit somagong nan aan-akmo ay magapo isnan il-ilin di mang-aamis ken daida.

¹⁷ Owen, wada nan namnamam pala isnan aan-akmo tay awnitda somaa isnan osto ay ilida.’ ”

³¹ Dat itoloy nan apo ay mangwani en, “Awnit omdan nan timpo ay makitolagak is balo ay tolag isnan ipogawko ay nan Israel ya nan Juda.

³² Baken paliso isdin nakitolagak isdin alal-apoda id kasin isdin nangbadangak ken daida ay komaan id Egipto tay olay sak-en ay apo ay Diosda nan nangbadang ken daida et egayda kayet tinongtongpal din nakitolagak ken daida.

³³ Ngem siya na nan balo ay awnitko makitolagan isnan Israelita. Kanak en awnitak ipagtek nan lintegko ken daida. Owen, ipanemnemko ken daida ta adida polos kalkalingkingan ta sak-en nan Diosda et daida nan ipogawko.

³⁴ Adi masapol ay itdowanda nan kakailyanda ay mangwani en getkenyo koma si Apo Dios tay awnitda am-in mamati ken sak-en ay menlogi isnan kababaan enggana isnan kangatowan ay ipogaw tay pakawanek nan basbasolda. Adiyak et nemnemnemen kasin nan ngawi ay inik-ikkanda.” Siya na nan kinwanin nan apo.