Jeremias 3 - Kalin Apo Dios

¹⁹ Dat kanan nan apo en, “Kalalayadko ay ibilang dakayo ay Israelita ay an-akko dakpay agtan dakayo is gawis ay daga ay kagawisan ay tawid isnan batawa. Kanak pay no ibilangyo abes sak-en ay amayo ya adiyo koma dokdokogan sak-en.

²⁰ Ngem dakayo obpay ay Israelita et kanegyo nan makilalalaki ay mangtayan isnan asawana tay egayyo patiyen sak-en dayot dokogan sak-en. Sak-en ay apo nan ninkali.”

²¹ Isonga wada nan kali ay mamadnge isnan toktok di bilbilig. Kalin di Israelita ay men-ad-adawag ay menseg-seg-ang tay ninbasobasolda ya dinokoganda nan apo ay Diosda.

²² Dat kanan nan apo en, “Ibabawiyo nan basbasolyo dakayo ay an-akko ay nangdokog ken sak-en ta pakawanek ya pabalinek dakayo ay matalek.” Dadat kanan en, “Owen, tongpalenmi sik-a tay sik-a nan Diosmi.

²³ Egay polos nangbadbadang nan sinangdidios ay dinaydayawmi isnan bilbilig tay nan badang ay pala ken dakami ay Israelita et magapo ken sik-a apo ay Diosmi.

²⁴ Tay nan nangdaydayawanmi ken Baal ay sinangdidios nan nang-amin isnan talakenmi ya nan an-akmi ya nan am-in ay ninbannogan din alal-apomi id kasin.

²⁵ Menlokbob kami ay mababain ya menpakombaba kami tay dakami ya din alal-apomi et ninbasbasol kami ken sik-a apo ay Diosmi. Egaymi polos pinatpati nan bilinmo.”