Jeremias 26 - Kalin Apo Dios

¹ Issan login di nintolayan Jehoyakim ay anak Josias id Juda,

² et kinwanin nan apo ken Jeremias en, “Itakdegmo isnan pantew di Templo ta ibagam ken daida ay makwani en Juda ay omey mendayaw isdi nan inbilinko. Ibagam am-iam-in ay maid laklaktawam.

³ Et waay dadlo idngeda et isaldengda nan ngawi ay ik-ikkanda. No ikkanda na et adiyak itoloy nan ninemnemko ay mangdosa ken daida.

⁴ Ibagam ken daida nan naay kinwanik en sak-en nan apo et no adiyo idnge nan bilbilinko ay inpagtekko ken dakayo

⁵ ya no adiyo tongpalen din kinkinwanin din egayyo pinatpati ay mamadtok ay kanayon ay inbab-aak ken dakayo

⁶ et awnitak bakasen nan Templo ay naay ay kaneg nan inikkak id Silo id kasikasin. Et no baosen nan ipogaw nan ib-ada et awnitda kanan en, ‘Ommat koma ken dakayo nan kaneg nan inikkan nan apo ay nangbakas id Jerusalem.’ ”

⁷ Dinngen nan papadi, mamadto ya am-in nan ipogaw nan mang-ibagbagaan Jeremias is dana isnan Templo.

⁸ Isonga idi kinwas Jeremias ay mangibaga isnan kaipoipogaw nan am-in ay inpagtek nan apo ken siya dadat mendepap et ibogawda en, “Lebbengna ay mapateyka.

⁹ Dakan aped kankanan isnan ngadan nan apo en awnit kaneg nan Silo nan naay Templo dakapay kanan en mabakas nan naay ili et awnit maid et mentetee.” Dat alibongbongan di kaipoipogaw si Jeremias issan Templo.

¹² Dat kanan Jeremias isnan mentotolay ya isnan kaipoipogaw en, “Inbaan nan apo sak-en ay mang-ibaga isnan awnit ommat isnan naay Templo ya isnan naay ili et siya nan dinngeyo.

¹³ Isonga masapol ay pagawisenyo nan ogaliyo ya nan ik-ikkanyo dayot patiyen nan apo ay Diosyo ta adina itoloy nan ninemnemna ay mangdosa ken dakayo.

¹⁴ Ngem sak-en et wadaak isnan kabaelanyo isonga kigad kayo is ikkanyo. Owen baw, ikkanyo ken sak-en nan nemnemenyo ay osto ay maikkan.

¹⁵ Ngem makailanyo tay no mangpatey kayo et awnit dakayo ya nan ipogaw isnan naay ili et makabasol tay patpateyenyo nan maid basolna tay nan apo nan nang-ibaa ken sak-en ay mangibaga isnan inbagak.”