Jeremias 23 - Kalin Apo Dios

Nan Awnit Ommat 23:1-6 , 23-29 ; 26:1-9 12-15 31:7-17 31-34 32:36-41

¹ Dat kanan nan apo en, “Aye nan awnitko pangdosa isnan mentotolay ay mangpaligligat ya adi mang-oolnos isnan ipogawko.

² Isonga sak-en ay apo ay Dios di Israelita et siya na nan kanak maipanggep issan mang-ayowan koma isnan ipogawko. Kanak en gapo tay egayyo inayowanan nan ipogawko ya egayyo inolnos daida dayopay inabog daida isonga dosaek dakayo id wani isnan ngawi ay inikkanyo.

³ Awnitak dagopen nan nabay-an ay ipogawko isnan il-ili ay nang-iwalasak ken daida daket pasagongen daida isnan osto ay ilida. Awnitda maganaganak et omadoadoda.

⁴ Daket piliyen nan mang-ayowan ken daida. Awnit adida et omeg-egyat ya adida kasin somadsadot ya maid et maam-amas ken daida.

⁵ Nganngani et nan timpo ay mangpiliyak isnan osto ay ali ay magapo isnan ap-on din si David. Nan ali ay deey et awnit masilib et awnit osto ya nalinteg nan ikkana.

⁶ Isnan timpona et awnitda maisalakan ay Juda ya awnit maid iyeg-egyatda ay Israel. Awnit ngadananda nan deey ay ali is ‘Nan apo ay Mangisalsalakan.’ ” Siya dadi nan kinwanin nan apo.

²³ Dat kasin kanan nan apo en, “Sak-en nan Dios ay wawawawada isnan am-in ay baken kedkedeng isnan es-esa ay tean.

²⁴ Maid makatabon is adiyak maila. Getkenyo met ay wawawawadaak isnan am-in.

²⁵ Getkek nan kinkinwanin nan mamadto ay menkamkampot ay mang-iyos-osal isnan ngadanko. Kankananda en inpagtekko ken daida nan damag isnan iitawda.

²⁶ Ay kaat pay ngen nan kabayag nan mang-al-allilawan nan mamadto isnan ipogawko isnan kampot ay apedda kankanan.

²⁷ Waay kananda ngen en dokogan nan ipogawko sak-en isnan mangibagbagaanda isnan iitawda ay kaneg nan nangdokogan din alal-apoda ken sak-en ta dayawenda nan baken tet-ewa ay dios ay Baal.

²⁸ Nan mamadto ay aped nin-iitaw et masapol ay ibagana ay aped iitaw. Dat abes nan mamadto ay nangdenge isnan inpagtekko et masapol ay kedeng nan ipagtekko is ibagana. Teken nan aped iitaw di mamadto isnan inpagtekko

²⁹ tay nan kalik et wada nan kabaelana ay kaneg nan apoy ay bomidang ya masilbi ay kaneg nan kasilbiyan di maso ay mangmekmek isnan bato.”