Jeremias 20 - Kalin Apo Dios

Nan Ninliliyan Jeremias 20:7-13

⁷ Dat kanan Jeremias en, “Nang-allilawka apo. Wada nan kabaelam od mo sak-en isonga nang-abakka. Mangselaselat nan kaipoipogaw ya am-ammenganda et sak-en.

⁸ Et no tonggal menkaliyak et kanayon ay ibibiyadko ay mangwani en kaeegyat nan ommat ken dakayo tay awnit dadama nan dosayo. Nan mang-ibagbagaak isnan kalim nan gapo ay mang-oyaoyawda dadapay mangselaselat.

⁹ Ngem no kanak en kalingkingak sik-a ta adiyak et menkalkali isnan ngadanmo et kaneg apoy is bomidang nan kalim isnan nemnemko. Padasek ay adi koma ibaga ngem adiyak makaitpe.

¹⁰ Dedengngek nan am-in ay mang-iyag-agasaas en, ‘Si todi nan iyeg-egyatda isnan am-in ay ili. Idalom tako siya.’ Olay nan gayyegayyemko et sesed-enda nan maabakak dadapay kanan en waay nganngani ay maallilawak ta ikkak nan baken osto tapno mangdepapda ta men-ibaesda.

¹¹ Ngem sik-a apo ay manakabalin nan wada ken sak-en isonga nan mang-aamis et adida makaabak ken sak-en ya adi makalkalkalingkingan nan maibabainanda.

¹² Ngem sik-a apo ay manakabalin et osto nan ikkam ay mangpadas isnan ipogaw tay getkem nan wada isnan nemnemda ya nan laylaydenda. Ipailam nan ikkam ay men-ibaes isnan mang-ap-apos ken sak-en tay sik-a nan mentalkak isnan am-in ay ik-ikkak.”

¹³ Danat itoloy ay mangwani en, “Menday-engak ay mangdayaw isnan apo tay isalakana nan maaamis isnan kabaelan nan ngawi.”