Jeremias 15 - Kalin Apo Dios

¹⁵ Dat itoloy Jeremias ay mangwani en, “apo, getkek ay getkem nan ligatko. Nemnemem sak-en ya mangbadangka. Baesam nan mang-aamis ken sak-en. Adim koma an-anosan daida ta adida mangpatey tay gegetkem ay nan gapona ay maoy-oyawak et nan mensilsilbiyak ken sik-a.

¹⁶ Inpagtekmo ken sak-en nan kaytem ay masolo et inidngek am-in ay kinwanim. Nan kinkinwanim nan nangpagawis isnan nemnemko ya nangpalagsak ken sak-en tay sik-a apo ay manakabalin nan akinbaa ken sak-en.

¹⁷ Egayak nakikadkadwa isnan tap-in di ipogaw ay kanayon ay makiam-ammeng ya makilaglagsak. Gapo isnan mangtongtongpalak isnan kalim et maes-esangak et pilmi nan ligetko isnan dadama ay basbasol di ipogaw.

¹⁸ Ayta dan adiyak somaldeng ay menligligat? Daken adi gomawgawgawis? Ay maid ibadangmo ken sak-en? Ay kanegmo nan natdok ay balaan?”

¹⁹ Dat kanan nan apo ay mangsongbat en, “No menbabawika et awnitak aggan sik-a ay baak kasin. No nan kankanam et gawis ta baken nan maid paayna et awnitka kasin menbalin ay kinatopekko. Awnit menbabawi nan kaipoipogaw ya idngeda sik-a ngem bakenka is mang-id-idnge ken daida.

²⁰ Awnitko pabalinen sik-a is baken nalaka ay maaw-awis. Olay no aposenda sik-a ngem adida makaapos tay wadaak ay mangsalsalaknib ken sik-a tapno maid om-ommat.

²¹ Awnitak isalakan sik-a isnan kabaelan nan ngawi ay ipogaw. Sak-en ay apo nan ninkali.”