Jeremias 14 - Kalin Apo Dios

Nan Dadama Ay Kegang 14:1-10 , 19-22 ; 15:15-21

¹ Inbagan nan apo ken Jeremias nan maipanggep isnan awnit dadama ay kegang et kanana en,

² “Menseseg-ang nan makwani en Juda tay menligligat nan il-ilida. Gapo isnan menseseg-anganda et menlokbobda ay iJerusalem isnan lota ta mendawatda is badang.

³ Nan babaknang et menpasakdoda isnan baada ngem maid danom is insaada. Dat gapo isnan bain ya danagda et lingbanda nan ang-angasda.

⁴ Gapo tay maid odan et nakgang nan lota isonga nan men-ob-obla isnan paypayewda et menseseg-angda dadapay lingban nan ang-angasda.

⁵ Olay nan oogsa et taynanda nan an-akda tay maid logam is kanenda.

⁶ Nan atap ay kabayo et tomatakdegda ay menpap-aes isnan bilbilig ay kanegda atap ay aso dapay komapsot nan matada tay maid kanenda.”

⁷ Dat men-adawag si Jeremias ay mangwani en, “Olay no paneknekan nan basbasolmi nan kinangawimi isnan namin-ado ay nangdokoganmi ken sik-a et badangam koma dakami apo tapno adi maibaba nan ngadanmo

⁸ tay sik-a et kedeng nan namnaman nan Israelita ya sik-a nan mangisalakan ken dakami isnan maligligatanmi. Ngem ayta od dakan kaneg sangaili isnan dagami? Kanegka nan menbibiyahi ay omapa is esay labi et kedeng.

⁹ Ay nasngangka ay kaneg nan nasngang ay ap-apon di omili ay maid kabaelana ay bomadang? Ngem olay no keg todi apo et wawawawadaka kayet ken dakami ay ipogawmo isonga adim koma baybay-an dakami.”

¹⁰ Siya abes na nan kanan nan apo maipanggep isnan naayda ay ipogaw. Kanana en, “Laylaydenda ay itagtagan sak-en ya adida makaitpe isnan ik-ikkanda isonga adiyak magasingan ken daida. Nanemnemko id wani nan ngawi ay inik-ikkanda et dosaek daida.”

¹⁹ Dat mendawat nan deeyday ipogaw ay mangwani en, “apo, ay inadyam et nan makwani en Juda? Ay kaliligetmo daida ay iJerusalem? Aye pay di inikkam ay nangsogat ken dakami et adi kami gomawgawgawis. Anapenmi nan talna ngem maid gawis is mas-edmi. Namnamaenmi ay maagasan ngem egyat nan wada.

²⁰ apo, getkenmi ay managbasol kami ay maitapi din alal-apomi tay ninbasol kami ken sik-a.

²¹ Adim koma baybay-an dakami tapno adi maibaba nan ngadanmo ya adi maibabain nan ilim ay Jerusalem ay itoltolayam. Adim koma kalkalingkingan nan nakitolagam ken dakami.

²² Tay getkenmi ay adi makaipaodan nan sinangdidios di tap-in di il-ili. Olay pay nan daya et adina aped tekdagen nan lagey tay kedengka ay apo ay Diosmi is makaikkan is dana isonga sik-a et kedeng nan namnamami.”