Jeremias 1 - Kalin Apo Dios

1:1-3

¹ Nan naisolat isna et nan inbagbagan Jeremias ay anak Hilkias ay easy padi id Anatot isnan sakop din si Benjamin.

² Isdin maikasimpoo ya tolo ay tew-en ay nintotolay id Juda si Josias ay anak Amon dat wada nan inpagtek nan apo ken Jeremias.

³ Dat kasin nin-ipagtek ken siya isdin timpon ali Jehoyakim ay anak Josias. Dat nin-ipagpagtek pay kayet enggana ay naikaan nan iJerusalem ay maibalod isnan teken ay ili isdin maikalima ay bowan isnan maikasimpoo et esa ay tew-en ay nintotolayan Sedekias ay anak Josias gedan.

Pinilin Nan apo Si Jeremias 1:4-10 ; 3:19—4:2 7:1-15

⁴ Dat ibagan nan apo ken sak-en en,

⁵ “Jeremias, pinilik sik-a esakapay maboliw. Esakapay maiyanak et dinotokak et sik-a ay mamadto isnan batawa.”

⁶ Daket kanan en, “Owen a ngem apo, adiyak getken ay komali ay osto tay ongaak pay laeng.”

⁷ Ngem dat kanan nan apo ken sak-en en, “Adim kanan en daanka ay onga nodi omeyka isnan ipogaw ay mang-ibaaak ken sik-a ta ibagam ken daida nan am-in ay ibilinko.

⁸ Adika omegyat ken daida tay wawawawadaak ay mangbadang ken sik-a. Sak-en ay apo nan ninkali.”

⁹ Dat kaneg sinikgad nan apo nan sobilko et kanana en, “Dengngem tay naay ipagtekko ken sik-a nan awnitmo kankanan.

¹⁰ Id wani et itedko nan kabaelam isnan am-in ay ili ya pagtolayan di aali. Sik-a et nan mangibagbaga isnan makaan, madosa ya nan maabak gapo isnan kangawida. Sik-a gedan nan mangibaga isnan awnit mangsapo isnan nabakas ay ili ya nan kasin mais-ek no menbabawida.”