Isaias 9 - Kalin Apo Dios

¹ Id kasin et nabainan nan pangabong da Zebulon ken Naftali ngem awnitda madayaw kasin isnan dagada ay nan benget di Mediterranean enggana isnan bas-ang di Jordan et enggana id Galilea ay mentetean di baken Israelita.

² Nan ipogaw isdi et menbolinget nan nemnemda isonga kanegda natey tay adida getken si Apo Dios. Ngem awnit isdi nan mentanggewan nan silaw tay omey nan mang-isolo ken daida et awnit matanggewan nan nemnemda.

³ Sik-a apo nan nang-idya is gasing ken daida tay pinagasingmo daida. Men-gasingda gapo isnan inikkam ken daida ay kaneg nan ikkan di ipogaw ay men-gasgasing no men-anida ya isnan mangbingbingayanda is kinabaknang ay ginowadda

⁴ tay kinaanmo nan kaneg sangol ay mangpadadagsen ken daida ya nan kaneg pat-o ay mangpalpaligat ken daida. Sik-a nan nang-abak isnan mang-aamis ya mangpalpaligat isnan ipogawmo ay kaneg din nang-abakam isnan sosoldadon di iMidian id kasikasin.

⁵ Awnit maisonod am-in ay botas ya nabasaan ay badbado ay inosal di sosoldado ay nakigobat.

⁶ Tay wada nan lalaki ay maiyanak pala ken datako et awnit siya nan mentolay ken datako. Awnit siya nan makwani en, “Masilib ay mamagbaga,” “Manakabalin ay Dios,” “Ama ay eng-enggana,” “Alin di menlamlamnin.”

⁷ Nan itolayana et omad-ad-ado ya awnit nan lamnin et eng-enggana tay siya nan mangtawid isnan mentolayan din alapona ay si Ali David. Menlogi id wani et enggana et nan osto ya nalinteg nan ikkana isnan mentolayana. Tet-ewa ay ikkan nan apo ay manakabalin am-iam-in dana tay siya nan kayatna ay maikkan.