Isaias 7 - Kalin Apo Dios

Nan Awnit Omali Ay Mentolay 7:10-17 ; 9:1-7

¹⁰ Isdin timpon Ali Ahaz et inpagtek nan apo ken siya nan naay,

¹¹ “Ibagam ken sak-en ay Diosmo ta agtak sik-a is sinyal. Mabalin ay magapo isnan tean di natnatey wenno olay id ngato ay daya.”

¹² Dat kanan Ahaz, “Adiyak mendawdawat is sinyal tay adiyak kayten ay mangpadpadas isnan apo.”

¹³ Dat kanan obpay Isaias, “Dengngenyo id wani, dakayo ay ap-on ali David. Ay adi kayo mapnek ay mang-amin isnan anos di ipogaw? Ay masapol pay laeng ay aminenyo nan anos Apo Dios?

¹⁴ Id wani ngalod et nan apo mismo nan mang-idya is sinyal. Awnit maliton nan babassang ay maid nang-iseyseyep et omanak is lalaki danat ngadnan is Immanuel.

¹⁵ Esapay masiken ta getkena ay mang-adi is ngawi ta nan gawis nan ikkana et awnit gatas ya dilo et kedeng nan kankanen nan ipogaw

¹⁶ tay esapay omdan nan deey ay timpo et mabaybay-an nan daga ay itoltolayan nan dowa ay ali ay iyeegyatyo.

¹⁷ Awnit ipaey nan apo ken sik-a, Ahaz, ya isnan ipogawmo ya isnan pamilyam nan pilmi ay baos no din inom-ommat enggana isdin naisiyanan nan itoltolayan Israel isnan Juda tay awnitna ipaey ken dakayo nan alin di Asira.”