Isaias 66 - Kalin Apo Dios

¹⁰ Makigasing kayo isnan Jerusalem ya men-gasing kayo pala ken siya, dakayo am-in ay manglayad isnan naay ili. Dakayo am-in ay ninseseg-ang gapo ken siya et makigasing kayo ken siya id wani.

¹¹ Mapnek kayo isnan somikaana ay kaneg nan mapnekan di mensososo ay engnga isnan inana.

¹² Kanan nan apo, “Awnitak agtan dakayo is mamapnekanyo ay eng-enggana. Et nan kinabaknang nan il-ili et awnitda men-ayos ken dakayo ay kaneg nan ginawang ay adi makmakgang. Awnit kayo kaneg nan engnga ay ay-ayowanan nan inana danapay pasosowen ya ab-abaen.

¹³ Awnitak liwliwaliwen dakayo id Jerusalem ay kaneg nan ikkan nan ina isnan anakna.

¹⁴ No ilaenyo ay ommat na et awnit gomasing kayo. Awnit kayo pomigsa ya makneg. Et siya nan mangtekanyo ay sak-en ay apo et badangak nan mangtongpal ken sak-en dakpay ipaila nan ligetko isnan mang-ap-apos ken sak-en.”

¹⁵ Awnit omali nan apo ay omikakawit is apoy. Kanegna sasakayan nan lemlem ay omali mangdosa isnan kaliligetna.

¹⁶ Et awnitna dosaen is apoy ya gamig am-in ay getkena ay nakabasol isnan batawa et ado nan mapatey.