Isaias 65 - Kalin Apo Dios

Nan Balo Ay Daya Ya Batawa 65:17-25 ; 66:10-16

¹⁷ Kanan nan apo, “Bomoliwak is balo ay daya ya balo ay batawa et maid et mangnemnemnem isnan sigod gapo isnan kawadan nan balo.

¹⁸ Men-gasgasing ya menlaglagsak kayo ay enggana gapo isnan boliwek tay nan balo ay Jerusalem ay boliwek et awnit mamapno is lagsak ya men-gasgasing nan ipogawna.

¹⁹ Olay sak-en mismo et pilmi nan gasingko gapo isnan Jerusalem ya nan ipogawna. Awnit maid am-in nan gapo ay men-ag-agaanda ya maid menpabadbadang.

²⁰ Awnit adi et matmatey nan engnga ya am-in nan ipogaw et adida katkatey engganay sokod maeteetengda. Nan sin-gasot nan tew-enda et kanegda adi kaet-et-eteng. No matey esapay omdan nan naigeddeng ay biyagna et siya nan mang-ipaila ay dinosak siya.

^21-22 Awnit mensaad nan kaipoipogaw is bab-aeyda dadat baeyan et maid teken is mangkowa. Nan menmola is obas et daida met laeng nan mang-inom isnan danomna tay maid manggowad ya adi in-inomen di teken ay ipogaw. Nan ipogawko et awnit mabayag nan matatagowanda ay kaneg nan matatagowan di kak-aiw. Isonga wada nan wayada ay manggan-ganas isnan ninbanoganda.

²³ Am-in ay ik-ikkanda et awnit masilbi ya maid om-ommat is kaeegyat isnan an-akda. Bindisyonak daida ya nan ap-oda ay eng-enggana.

²⁴ Olay no esadapay makwas ay menlowalo ken sak-en et epdasko sinongbatan et nan lowaloda.

²⁵ Awnit men-obong nan atap ay aso isnan anak di kalnilo ya mangan nan layon is sakati ay kaneg nan kanen di baka ya adi menketeb nan oweg. Et id Sion ay bilig Apo Dios et maid polos menpasaksakit ya ngawi.”