Isaias 64 - Kalin Apo Dios

Dawaten Nan Ipogaw Nan Badang Apo Dios 64:1-9

¹ “apo, tokabam koma nan daya ta gomwabka. No ikkam et pomayegpeg nan bilbilig is egyatda.

² Pomayegpegda ay kaneg nan ikkan di danom isnan menlol-owagana. Omalika ta ipailam nan kabaelam isnan mang-ap-apos ken sik-a ya papayegpegem nan kailiili isnan sagangmo.

³ Wada nan namingsan ay inmaliyam dakat nin-ikkan isnan kaeegyat ay egaymi gin-gintek et inilan nan bilbilig sik-a dadat pomayegpeg is egyatda.

⁴ Maid pay laeng nakail-ila wenno nakadengdenge is dios ay kanegmo ay mang-ikkan is keg datosa pala isnan mamati ken siya.

⁵ Tay badbadangam nan men-gasing ay mang-ikkan is osto ay mangnemnem isnan kaytem. Ngem isnan mang-itoltoloyanmi ay men-ikkan is ngawi et makalkaligetka ken dakami isonga ngan ngen di ikkanmi ta maisalakan kami?

⁶ Am-in kami et managbasol kami. Olay no padasenmi ay ikkan nan gawis et nan kagawisan ay inik-ikkanmi et nalogit kayet. Gapo isnan basbasolmi et kan-eg kami tobon di mola ay naango ay itaytayaw di dagem.

⁷ Maiwed pay menlowalo ken sik-a ya mendawat is badangmo. Intabonam od dakami et binaybay-am dakami gapo isnan basbasolmi.

⁸ Ngem sik-a apo nan amami. Kaneg dakami nan kolayeng et kaneg sik-a nan mensapsapo is banga tay binoliwmo dakami

⁹ isonga adika koma pilmi makalkaliget ken dakami ya adim singsingilen nan basolmi ay eng-enggana. Seg-angam kad dakami tay ipogawmo dakami.”