Isaias 62 - Kalin Apo Dios

Nan Mensaganaan Isnan Omaliyan Nan apo 62:1-7 , 10-12

¹ Sik-a ili ay Jerusalem, komaliyak ay mangpapigsa ken sik-a. Adiyak gomin-ginek enggana ay maisalakanka ya enggana ay somilang nan mangabakam ta kanegna nan silew isnan labi.

² Awnit ilaen di kaipoipogaw nan mangabakam ya ilaen gedan nan aali nan kinabegewmo. Nan apo mismo nan mangngadan ken sik-a is balo ay ngadan.

³ Maidiligka isnan menbelelegew ay kolona ay gegen-an nan apo ay ipap-ailana isnan ipogaw.

⁴ Adika et makmakwani en, “Nabaybay-an ay Daga” wenno “Daga ay Kinalingkingan Apo Dios” nodi nan balo et ay ayagmo et “Daga ay Kagagasing Apo Dios” ya “Nalagsak ay Nakiasawa” tay kagagasing nan apo sik-a et kowana et sik-a.

⁵ Awnit men-galalasing nan an-akmo, Jerusalem, ay mang-ayowan ken sik-a ay kaneg nan gasing di baballo isnan mang-asawaana isnan babassang. Et pilmi nan gasing Apo Dios ken sik-a ay kaneg nan gasing di kaas-asawa.

⁶ Jerusalem, isnan aladmo et men-ippeyak is gowaldiya et masapol ay adida igiginek isnan kag-aw ya labi. Masapol ay adida salsaldengan ay mang-ipanemnemnem isnan apo nan inkalina.

⁷ Masapol ay adida pasalsaldengen engganay bangonena kasin nan Jerusalem ta pabalinena is ili ay daydayawen di kaipoipogaw.

¹⁰ Dakayo ay iJerusalem, bomala kayo isnan naay ili ta somapo kayo is daan pala isnan iib-ayo ay somas-aa. Dalosanyo ya kaanenyo nan batbato dakayot tooden nan sinyal

¹¹ ta panggetkan nan kaipoipogaw isnan ipagpagtek nan apo enggana isnan solsolin nan batawa. Ipabagana isnan iJerusalem en, “Omali et nan apo ay mang-isalakan ken dakayo et ikakawitna nan ipogaw ay insalakana.”

¹² Awnit kayo makwani en, “Nadiosan ay ipogaw Apo Dios” ya “Nan ipogaw ay insalsalakan nan apo” et nan Jerusalem et awnit makwani abes en “Nan ili ay laylayden Apo Dios” ya “Nan ili ay egay binaybay-an Apo Dios.”