Isaias 60 - Kalin Apo Dios

Nan Awnit Gawis Isnan Jerusalem 60:1-6 , 8 9

¹ Jerusalem, bomangonka ta somilangka ay kaneg nan agew tay nan kinangaton nan apo et sisilangana sik-a.

² Makobotan is bolinget nan il-ili ngem silangan nan silaw di apo sik-a. Nan kapat-an nan kawad-ana et wada ken sik-a.

³ Awnit somag-en nan il-ili ken sik-a gapo isnan silawmo ya omali nan aali isnan pomat-aan nan kaneg balo ay agew.

⁴ Menmolika pod isnan liliwesem ta ilam nan om-ommat. Somas-aa et nan an-akmo dadat madagop isnan kad-am. Mendad-aan nan lalalaki ay magapo id ad-addawi dapay nan bababai et maaawitda.

⁵ Mo ilaem na et pilmi nan gasingmo et lomagto nan posom gapo is lagsakmo. Iyeyda ken sik-a nan kinabaknang nan il-ili ay olay nan magapo isnan bas-ang di baybay.

⁶ Omey ken sik-a, Jerusalem, nan adoado ay kamelio ay magapo id Midian ya id Efa ay ilin di Seba ay nang-ipaawitanda isnan balitok ya insenso ay mang-ipagtek isnan pangdayaw di ipogaw isdi isnan apo.

⁸ Sino ngen nan deeyda ay bapol isnan baybay ay kaneg nan malmalosan di liboo ya kaneg nan somas-aaan di adoado ay koyat ay somas-aa nan kaiilaanda.

⁹ Daida nan bapol ay magapgapo isnan anaddawi ay il-ili ay mang-isaa isnan ipogaw Apo Dios. Ikakawitda nan palata ya balitok ay idayawda isnan ngadan nan apo ay Dios di Israel ay nang-ipadayaw isnan ipogawna isnan am-in ay kaili-ili.