Isaias 6 - Kalin Apo Dios

Nan Nang-ayagan Apo Dios Ken Isaias 6:1-8

¹ Isdin tew-en ay nateyan nan ali ay si Uzzias et naipaila ken sak-en nan apo ay tinmotokdo isnan tokdowan di ali isnan Templo ay aap-apan nan kagayna nan Templo. Nangato siya ya madaydayaw.

² Isnan liliwesena et wadada nan menbidbidang ay matatago. Nan wasdin esa ken daida et napapayakan is sag-en-em. Dowa nan mangsasalin isnan angas, dowa isnan awak dat nan dowa et siya nan pala tayawda.

³ Idayday-engda isnan wasdin esa en, “Maiwed polos makaiso ken Apo Dios. Siya et kedeng nan kangatowan ya kaostowan. Am-in ay binoliwna et ipailada nan kinaostona ya nan kinangatona.”

⁴ Dat nin-iwedwed nan day-engda nan pegnad di Templo et mapno nan Templo is asok.

⁵ Daket kanan, “Ay inayan, maid et namnamak. Nabaosak tay nalogit nan topekko ya am-in ay kailyak et ngawi gedan nan kankananda dakpay inila et isnan mismo ay matak nan Ali ay apo ay manakabalin.”

⁶ Dat tomayaw nan esa ay matatago et ompa ken sak-en ay ginegen-ana nan men-gabgabbang ay oling ay sinipitna isnan altar.

⁷ Danat isikgad san men-gabgabbang ay oling isnan sobilko danat kanan, “Sinikgad nan naay nan sobilmo et nakaan nan basolmo ya napakawanka et.”

⁸ Daket dengngen ay kanan nan apo, “Sino pay di esak ibaa? Sinoy esami bab-aaen?” Daket kanan, “Naayak ya, apo. Sak-en nan baaem.”