Isaias 59 - Kalin Apo Dios

Nan Basol Nan Gapo Ay Adi Badangan Apo Dios Nan Ipogawna 59:1-4 , 9-19

¹ Adiyo kanan en nan apo et nakapsot ay mang-isalakan ken dakayo wenno natotoweng ay mangdenge isnan ayag ken siya.

² Tay nan basbasolyo nan gapo ay adina mangdengngan ken dakayo. Nan basbasolyo nan mangpapasiyan ken dakayo is ken Apo Dios isnan kananyo en mendaydayawanyo ken siya.

³ Tay no ipangatoyo nan ledengyo ay menlowalo et maila nan mansa isnan ledengyo dapay abes nan topekyo ay menkalkali is kampot et siya nan osalenyo isnan menlowalowanyo.

⁴ Om-omey kayo isnan pag-okoman ngem baken nan nalinteg is patpatiyenyo nodi nan kampot nan patpatiyenyo ay mangpangabak ken dakayo dayopay nemnemnemen nan ikkanyo ay mangpasakit isnan iib-ayo.

⁹ Isonga adi isalakan Apo Dios datako isnan mang-aamis ken datako. Men-anap tako is silaw ay mangtanggew isnan daanen tako ngem menbolinget kayet.

¹⁰ Kan-eg tako kowap ay menkapkapokap datakopay maisogto isnan kag-aw ay kaneg labi ya kaneg tako wada isnan menbolinget ay tean di natnatey.

¹¹ Isonga omegyat tako ya madanagan tako. Sesed-en tako nan mang-isalakanan Apo Dios ken datako isnan maaamisan tako ya mapalpaligatan tako ngem maid mas-ed tako.

¹² apo, adi mabilang nan basolmi ken sik-a. Banagen nan basbasolmi dakami tay gegetkenmi am-in nan basolmi.

¹³ Ninsokil kami ken sik-a tay inadyanmi sik-a ya inadyanmi ay omonod ken sik-a. Pinalpaligatmi nan iib-ami dakami pay dinokogan sik-a. Kampot nan kankananmi ya nan baken tet-ewa nan nemnemnemenmi.

¹⁴ Maseseyatan nan kinalinteg isonga adi makasag-en nan osto. Nan tet-ewa et maiiyaw isnan pag-ag-agongan isonga maid mang-ikkan is osto.

¹⁵ Mamam-aid et nan mang-ik-ikkan is gawis isonga no waday mang-isaldeng ay mang-ik-ikkan is ngawi daet siya nan maipasobo. Inilan nan apo na daet mainge tay maid kinalinteg.

¹⁶ Masdaaw ay mang-ila ay maid olay esa is mangbadang isnan mapalpaligatan. Isonga osalena nan kabaelana ay mang-isalakan ken daida et mangabak siya.

¹⁷ Nan kinalintegna et siya nan salidana. Nan kaneg salidan di olona et nan mang-isalakanana isnan ipogawna ya abes nan kaneg salidan di awakna et nan napigsa ay nemnem ay mang-ipaosto ya mangdosa ya mang-ibaes isnan ngawi ay ikalkalon di ipogaw.

¹⁸ Awnitna dosaen nan mang-ap-apos ken siya sigon isnan inik-ikkanda ay olay nan wada isnan ad-addawi

¹⁹ menlogi isnan balaan di agew et enggana isnan maon-onogan di agew et awnit iyegyat nan am-in siya ya nan kabaelana. Awnit omali ay kaneg napigsa ay men-ay-ayos ay danom ya kaneg nan napigsa ay dagem.