Isaias 57 - Kalin Apo Dios

Nan Badang Apo Dios Isnan Mamati Ken Siya 57:14-21

¹⁴ Kankanan nan apo en, “Ipasagongyo ken sak-en nan ipogawko. Kaanenyo nan mangseseyat isnan daanenda. Estenyo nan daan ta isaganayo.

¹⁵ Sak-en nan nangato ya manakabalin ay Dios ay matatago ay eng-enggana. Nan kad-ak et nangato ya nadiosan ngem makiteeak gedan isnan mang-ipababa isnan awakda ya mang-ibabawi isnan basolda tapno kasinko pabalinen daida ay matalek ya ta waday namnamada.

¹⁶ Adiyak itoloy ay mangpabpabasol ya ligligtan daida ay enggana tay no ikkak di et baka mateyda dapay sak-en nan mangbibiyag ken daida.

¹⁷ Linigtak daida gapo isnan basbasolda ya kanaagomda daket dosaen daida dakpay binaybay-an daida ngem inkekedseda kayet et ikkanda nan laylaydenda.

¹⁸ Iilak nan ik-ikkanda ngem awnitak pagawisen daida daket ipangpango ya badbadangan daida dakpay liwliwaliwen nan menseseg-ang.

¹⁹ Idyak nan talna isnan am-in ay ipogawko ay mangkayat ay naisasag-en ya naiyaaddawi daket pagawisen daida.

²⁰ Ngem nan dakes ay ipogaw ay mang-adi is talna et adida makasaldeng ay kanegda nan dalloyon di baybay ay maid saldengna ay mangidateng is logit ya pitek.

²¹ Maid talna ken daida ay managbasol.” Siya na nan kanan nan apo.