Isaias 56 - Kalin Apo Dios

Mabalin Ay Maitapi Nan Am-in Ay Ipogaw Ken Apo Dios 56:1-7

¹ Kanan nan apo isnan ipogawna, “Ikkanyo nan gawis ya nan osto tay nganngani nan mang-isalakanak ken dakayo et siya nan mang-ipaila isnan kinalintegko.

² Nagasat nan mangpati ken sak-en ay omilleng isnan maikapito ay agew ya maid pay ngawi is ik-ikkana. Owen, pagasingek nan adi mang-ik-ikkan is ngawi.”

³ Nan baken Israelita ay mamati ken Apo Dios et adida koma kankanan en, “Adi samet ipalobos nan apo nan maitapiyanmi isnan ipogawna ay makidayaw.” Adi koma nemnemnemen gedan nan nakapon ay ipogaw en gapo tay adi makaanak dat adi polos mabalin ay maitapi isnan ipogaw Apo Dios.

⁴ Tay kanan nan apo isnan keg datona ay ipogaw en, “No dayawenyo sak-en isnan mang-ingilinanyo isnan agew di illeng ya ikkanyo nan mangpagasing ken sak-en dakayopay tet-ewa ikkan nan nintolagan tako

⁵ et nan itedko ken dakayo et gawgawis pay mo nan maidaydayawan di am-ama ay naganak tay nan idyak ken dakayo et nan makiteeanyo isnan baeyko ay enggana isonga adi kamkammid nan ngadanyo.”

⁶ Dat kanan nan apo isnan baken Israelita ay manglaylayad ya mensilsilbi ken siya ay mang-ingilngilin isnan agew di illeng ya mangpateg isnan nakitolagana ken daida ay naitapi isnan ipogawna en,

⁷ “Awnitak iyey dakayo id Sion ay nan nadiosan ay biligko daket pagasingen dakayo isnan baeyko ay paglowalowan dakpay dawaten nan idatonyo isnan altarko. Nan baeyko et paglol-owalowan di ipogaw ay nagapo isnan am-in ay ili.”