Isaias 55 - Kalin Apo Dios

Nan Mang-ayagan Apo Dios Isnan Ipogaw 55:1-13

¹ Kanan nan apo en, “Omali kayo am-in ay naewew tay naay di danom. Omali kayo dakayo ay maid sipingna ta lomako kayo is makan dakayopay mangan. Omali kayo ta lomako kayo is mainom et adi masapol di bayadanyo dana.

² Ayta dayon aped laklakowan di adi makapnek? Dayon aped gastosen nan lagboyo dakayopay kayet maoowat? Dengngenyo nan kanak dayot ikkan nan ibagak et awnit ganasenyo nan kagawisan ay makan.

³ Dengngenyo ay ipogawko dakayot omali ken sak-en. Omali kayo ken sak-en ta wada nan biyagyo. Makitolagak ken dakayo is tolag ay eng-enggana daket idya ken dakayo san bindisyon ay inkalik ken David.

⁴ Pinabalinko siya ay men-ipangpango ya mentolay isnan kailiili daket osalen siya ay mang-ipaila isnan kabaelak.

⁵ Id wani et ipaayagmo nan ado ay baken Israelita tay isnan namingsan et egayda gin-gintek sik-a ngem id wani et mentagtagda ay omali ay maitapi ken sik-a. Sak-en nan apo ay Diosmo ay Dios gedan di Israel et awnitak ipaikkan am-in dana daket agtan sik-a is dayaw ya ipangatok sik-a.”

⁶ Somagong kayo isnan apo dakayot menlowalo ken siya tay asag-en siya id wani.

⁷ Dakayo ay nasokil, isaldengyo nan ngawi ay ogaliyo dayopay teknen nan panagnemnemnemyo ta somagong kayo isnan apo ay Dios tako ta seg-angana dakayo danat pakawanen nan basbasolyo tay dadama nan seg-angna isonga managpakawan.

⁸ Kanan nan apo en, “Nan nemnemko et baken kaneg nan nemnemyo ya nan ogalik et baken gedan kaneg nan ogaliyo

⁹ tay nan kangaton di daya isnan lota et siya nan kaneg nan kangaton nan ogalik isnan ogaliyo ya nan nemnemko isnan nemnemyo.

¹⁰ Nan kalik et kaneg nan odan ay magapo id daya ay mangsibog isnan lota danat patobowen nan esek ta wada nan bowa ay kasin mais-ek ya makan.

¹¹ Keg todi gedan nan kalik tay awnit ikkanda nan kayatko ya tongpalenda am-in ay ipaikkak.

¹² Awnit men-gasgasing kayo ay mawayaan tay wada nan mang-ipangpango ken dakayo et menlamlamnin kayo. Nan bilbilig et menkantada dapay menbogaw nan kak-aiw is gasingda.

¹³ Tomobo nan batbatang isnan kad-an di poket ya nan ib-an di kaiw isnan kad-an di sibit. Et awnit siya na nan mang-ipaila ay eng-enggana isnan kinangatok ay apo.”