Isaias 53 - Kalin Apo Dios

¹ Dat kanan nan ipogaw, “Maiwed mamati isnan ibagbagami ya maiwed gedan mamati isnan inpail-ilam ay panakabalinmo.

² Kinayat nan apo ay nan baana et masiken ay kaneg nan esek ay tinmobo isnan nanakgang ay lota. Adi awisen nan ilana nan liknami ay mang-ila. Maid polos begewna ya maid polos makaawis is ilana tapno sag-enenmi.

³ Iniiyaw ya inadyanmi siya danapay intoltoled nan ligat ya sakit. Maid pay polos mangmoli ken siya ya egaymi inkaskaso siya ay kaneg maid silbina.

⁴ Ngem siya mismo nan manglak-am isnan ligat tako ya mangkaan isnan sakit tako. Inpagalop tako ay nan ligat ay inkalona et dosa ay inpabaklay Apo Dios ken siya

⁵ ngem gapo isnan basbasol tako et nadoy-ok siya ya nasaplisaplit gapo isnan ngawi ay inik-ikkan tako. Nawayaan tako gapo isnan dosa ay inkalona datako pay gomawis gapo isnan saplit ay linak-amna.

⁶ Tay id kasin et kaneg tako nan naamas ay kalnilo ay wasdin di omey isnan omay-ayana et inmaddaaddawi tako ken Apo Dios. Ngem inpalobos nan apo ay ken siya nan maikkanan nan dosa ay dosa koma pala ken datako.

⁷ Pinalipaligatda siya ngem intoltoledna ay egayna inbab-aes nodi apedna in-giginek. Kanegna nan kalnilo ay maiyey ay mapalti. Apedna igiginek ay kaneg nan kalnilo ay makoskoskosan ay maid lilina.

⁸ Dinpapda ay mangdosa dadat ikaan ta mapatey. Maid nang-ikaskaso isnan gasatna et napatey gapo isnan basbasol nan kaipoipogaw.

⁹ Maippey koma isnan pantiong di managbasol ay ipogaw ngem dat isnan nateyana et naitapi ay naikaob isnan kad-an di babaknang tay maid polos ngawi is inikkana ya egay polos ninkamkampot.”

¹⁰ Kanan nan apo, “Sak-en nan akinnemnem ay men-ikalo siya. Et nan nateyana nan daton ta mapakawan nan basbasol di ipogaw. Isnan keg todi et awnitna ilaen nan aan-akna ya mabayag nan matatagowana et gapo ken siya et matongpal nan laydek.

¹¹ No makwas et nan napalpaligatana daet menlagsak kasin. Awnitna getken et ay masilbi nan ninligligatana. Nan matalek ay baak ay kagagasingko et awnitna awiten nan dosan di adoado et gapo ken siya et pakawanek daida.

¹² Isonga agtak is nangato ay saadna ay maibagay isnan nangato ya masilib ay aamam-a. Tay iniidyana nan biyagna dapay maitapi isnan dosan nan ninpatpatey. Insaopna nan ado ay managbasol danapay ilowaloan daida ta mapakawanda.”