Isaias 5 - Kalin Apo Dios

Nan Day-eng Maipanggep Isnan Om-a 5:1-7

¹ Dengngenyo ta iday-engko nan maipanggep isnan gayyemko ya nan om-ana ay ineskana is obas. “Wada nan om-ana isnan bilig ay maloweb nan lota.

² Kinaykayna danapay kinaan nan batbato danat molaan isnan kagagawisan ay obas danapay isapowan is atakdag ay baey ay mentean di menbanbantayena. Ninsapo gedan is paglebkan di obas danat sesed-en et engganay maetengda. Ngem menpait am-in san obas.

³ Isonga dat kanan san gayyemko en, ‘Dakayo ay mentetee id Jerusalem ya Juda, kadya ibagayo no sino nan kabasol, ay sak-en wenno nan om-ak?

⁴ Ay wada ngen di kinalingkingak ay ikkan? Dan aped menpait pay nan obas ay adi mensam-it ay kaneg nan namnamaek ay ommat koma.

⁵ Siya na gayam nan ikkak isnan om-ak. Kaanek nan mola ay mang-aalad dakpay tokangen nan aladna daket baybay-an ay omey nan atap ay animal ay manggatin ya mangkakan.

⁶ Adiyak et patpatpaten nan sangada ya adiyak kaykaykayen nan poonda. Bay-ak ay solinen di sibit. Bilinek pay kitdi nan liboo ta adina paod-odanan daida.’ ”

⁷ Siya na nan kayat ay kanan nan naay day-eng. Nan om-an nan apo ay manakabalin et siya nan ili ay Israel ya san obas ay inis-ekna et daida nan ipogaw di Juda. Ninamnamana ay ikkanda koma nan gawis ya nalinteg ngem dat obpay menpatpatey nan inik-ikkanda. Ninamnamana ay nan osto koma nan ikkanda ngem danat dengngen obpay nan adawag di pinalpaligatda.