Isaias 49 - Kalin Apo Dios

Nan Israel Nan Awnit Mangipaila Isnan Badang Apo Dios 49:1-18

¹ Dengngenyo sak-en dakayo ay wada isnan ad-addawi ay il-ili. Esakpay maiyanak et pinilin nan apo sak-en ta dotokana sak-en ay baana.

² Pinabalina nan kalik ay mentadem ay kaneg tadem di gamig tapno songgep isnan nemnem di ipogaw danat salakniban sak-en isnan mismo ay limana. Pinabalina sak-en ay kaneg pana ay mentadem ay naisasagana

³ danat kanan ken sak-en en, “Israel, sik-a nan baak et gapo ken sik-a et mangdayaw nan kaipoipogaw.”

⁴ Daket kanan en, “Nin-ob-oblaak ngem maid silbin nan bannogko. Inippeyko nan am-in ay pigsak ngem maid ninbalinana. Ngem olay no keg todi et talkek kayet nan apo tay awnitna gon-gonaan sak-en isnan ik-ikkak.”

⁵ Dinotokan nan apo sak-en ay baana esakpay maiyanak ta isagongko nan ipogawna ay naiwakat ay ipogaw di Israel. Nan apo nan mang-idya isnan pigsak danapay idayaw gedan nan ik-ikkak.

⁶ Dat kanan nan apo ken sak-en en, “Wada nan am-ammed ay ipaoblak ken sik-a ay baak. Baken kedeng nan mang-isagongam isnan kinangaton nan ipogaw di Israel ay nabay-an is ikkam nodi ibaak sik-a pay ay omey mang-itdo isnan baken Israelita ay manglawag isnan nemnemda ta waday waya ay maisalakan am-in ay ipogaw isnan batawa.”

⁷ Wada nan kinwanin nan Dios ay kangatowan ay mang-isalsalakan isnan Israel. Kinwanina isnan baana ay maoy-oyaw ya liligten di il-ili ya baan gedan nan mentotolay en, “Awnit ilaen nan aali sik-a dadat tomakdeg ay mang-ipaila isnan panangdayawda ken sik-a. Awnit gedan ilaen nan tap-in di mentotolay sik-a dadat abes menlokbob ay mangdayaw ken sik-a. Awnit ommat na tay nan apo ay Dios di Israel et pinilina nan baana et tongtongpalena nan inkalina.”

⁸ Naay abes nan kanan nan apo isnan ipogawna. “No omdan nan mang-isalakanak ken dakayo daket dengngen nan lowaloyo et badangak dakayo. Bantayak dakayo et dakayo nan osalek isnan makitolagak isnan am-in ay ipogaw. Daket pateeen kasin dakayo isnan dagdagayo ay id wani et naadyan.

⁹ Daket kanan isnan balod en, ‘Mapalobosan kayo.’ Dakpay kanan isnan wada isnan menbolinget en, ‘Bomala kayo isnan kad-an di silaw.’ Et awnit kan-egda nan kalnilok ay mangmangan isnan bilig.

¹⁰ Et awnit adida polos kasin kaow-owat ya adida kasin kaew-ewew ya adida pay mapaligatan isnan kaeegyat ay agew tay sak-en ay mangsegseg-ang ken daida nan mang-ipangpango ken daida et iyeyko daida isnan balaan di danom.

¹¹ Awnitak somapo is daan isnan bilbilig ay mang-isagana isnan mendaanan nan ipogawko

¹² et magapoda isnan ad-addawi. Magapoda isnan lagod ya isnan maonogan di agew ya magapoda id Aswan isnan abagatan.”

¹³ Dakayo ay wada isnan daya et menkanta kayo. Dakayo abes ay wada isnan batawa, ibogawyo nan gasingyo. Dakayo ay bilbilig et menkanta kayo tay awnit liwliwaliwen nan apo nan ipogawna ya seg-angana nan ipogawna ay maligligatan.

¹⁴ Ngem kankanan nan ipogaw id Jerusalem en, “Binaybay-an nan apo datako danapay kinalingkingan datako.”

¹⁵ Daet kanan nan apo en, “Ayke mabalin ay kalingkingan di ina nan anakna ay pasososowena? Ayke waday ina ay adi manglayad isnan onga ay iyanakna? Ngem olay no kalingkingan nan ina nan anakna et adiyak polos kalingkingan dakayo.

¹⁶ Sik-a Jerusalem, adiyak polos kalingkingan sik-a tay insolatko nan ngadanmo isnan paladko.

¹⁷ Awnit omali nan kasin mangsaad ken sik-a dapay komaan nan nangbakas ken sik-a.

¹⁸ Menmolika pod ta ilaem nan om-ommat. Naay madagopda nan ipogawmo ay somaa. Nan katet-ewan nan matatagowak ay Dios et siya nan kaneg nan katet-ewan nan awnitmo mangit-it-ekan isnan ipogawmo ay kaneg nan mangit-ekan di bommey ay babai isnan alitos ya apangna.”