Isaias 45 - Kalin Apo Dios

Nan Nangdotokan Apo Dios Ken Ciro 45:1-7

¹ Pinilin nan apo si Ciro ay mentolay danapay dinotokan siya ay mang-abak isnan dadakke ay il-ili ya mangkaan isnan kalebbengan di aali tay tokaban nan apo nan segpan di il-ili ken siya. Kanan nan apo ken Ciro en,

² “Sak-en nan mang-isagana isnan daanmo et dataek nan bilbilig dakpay bakasen nan gambang ay segpanda ya gopongek nan landok ay seyatda.

³ Daket ipalobos ay alaem nan gameng isnan nang-igagagowanda. Et siya nan awnitmo manggetkan ay sak-en ay apo ay Dios di Israel nan nangpili ken sik-a.

⁴ Dinotokak sik-a ay mangbadang isnan baak ay iyIsrael ay ipogaw ay pinilik daket inpangato sik-a ta madayawka ay olay no adika mangmangtek.

⁵ Sak-en nan apo et maid polos teken is dios nodi sak-en et kedeng et agtak sik-a is pigsa ay masapolmo ay olay no adika mangmangtek.

⁶ Ikkak na tasiyay di am-iam-in ay ipogaw isnan solsolin di batawa et getkenda ay sak-en nan apo et maid teken is dios.

⁷ Sak-en nan mangpawada isnan silaw ya nan bolinget ya sak-en gedan nan mang-idya isnan bindisyon ya ligat tay sak-en ay apo nan mang-ik-kkan is dana am-in.”

Nan Kalebbengan Apo Dios 45:11-13 , 18-25

¹¹ Kanan nan apo ay Dios di Israel ay nangboliw ken daida en, “Ay wada od kalebbenganyo ay mangsoot ken sak-en is awnit ommat isnan maipanggep nan an-akko wenno mang-ibagbaga ken sak-en is masapol ay ikkak?

¹² Tay sak-en nan nangboliw isnan batawa ya nangsapo isnan ipogaw ay mentetee. Daet isnan panakabalinko et inoyadko nan daya daket ippey nan agew, nan bowan ya nan taltalaw isdi.

¹³ Sak-en mismo ay mang-ipaikkan ken Ciro isnan ikkana ta matongpal nan laydek ya mapaosto nan am-in ay banag et maid nangbayad wenno nangpasoksok ken siya ta ikkana dana. Dataek am-in ay daan ay daanena ta kasina tooden nan ilin nan Jerusalem danapay wayaan nan ipogawko ay naibabalod.” Siya na nan kinwanin nan apo ay manakabalin.

¹⁸ Nan apo ay nangboliw isnan daya et siya et kedeng nan tet-ewa ay Dios. Siya gedan nan nangboliw isnan batawa danapay esten ay makneg ya adi kadadadael. Egayna aped sinapo ay maid silbina nodi ta mentean di kaipoipogaw. Et siya nan nangwani en, “Sak-en nan apo et maid teken is Dios.

¹⁹ Egayak in-gagago nan ninkalkaliyak wenno in-gagago nan laydek ay maikkan ya egayak pay inbagbaga isnan iyIsrael en mang-anapda isnan adiyak kaanapan. Sak-en nan apo et nan kankanak et tet-ewa ya ipagtekko nan osto.”

²⁰ Kinwanin pay nan apo en, “Madagop kayo ay kaipoipogaw, dakayo am-in ay nabay-an issan naabakan di aali. Omali kayo ta mabanag kayo, dakayo ay mang-iliblibot isnan tinagtago ya menlol-owalo ken daida ay sinangdidios ay adi makaisalakan. Nan kaneg todi ay ipogaw et maid polos nemnemna.

²¹ Omali kayo ta ipagtekyo nan kasoyo isnan pag-okoman dayot ipalobos ay mensinoot nan naidalom. Sino nan nang-ipagtek id kasin isnan awnit ommat? Ay bakenak? Tay sak-en nan apo ay Dios nan mang-isalsalakan isnan ipogawna et maid teken is dios.

²² Somagong kayo ngalod ken sak-en tapno maisalakan kayo, dakayo am-in ay ipogaw isnan batawa. Kedkedengak is Dios et maiwed teken.

²³ Nan inkalik et tet-ewa ya adi kasoksokatan. Ipapasnekko ay mang-ikali et awnit omali am-in ay ipogaw ay menpalintomeng ken sak-en. Awnitda kanan am-in en tet-ewa ay sik-a nan Dios.

²⁴ Dadapay kanan en si Apo Dios et kedeng nan kagapowan di kinalinteg ya pigsa. Ngem am-in ay mangliliget ken sak-en et awnitda mabainan.

²⁵ Sak-en ay apo nan awnit mang-isalakan isnan am-in ay ap-on Jacob et awnitda mangdayaw.”