Isaias 44 - Kalin Apo Dios

Kedkedeng Si Apo Dios Is Dios 44:1-8

¹ Kanan nan apo, “Id wani dengngenyo sak-en, dakayo ay Israelita ay baak, dakayo ay nan ap-on din si Jacob ay pinilik ay ipogawko.

² Sak-en nan apo ay nangboliw ken dakayo et menlogi isdin nailitonanyo et binadbadangak dakayo. Adi kayo omegyat tay dakayo nan baak ya pinilik ay ipogawko ay laylaydek.

³ Awnitak agtan is danom nan ili ay maewew ya pabal-ek nan ginawang isnan nanakgang ay lota. Kaneg todi nan ikkak ay mang-ibokbok isnan panakabalinko isnan an-akmo ya ikkak ay mangbindisyon isnan ap-om.

⁴ Et awnitda lomangto ay kaneg nan logam ay masibsibogan ya kaneg nan kak-aiw ay tomotobo isnan benget di ginawang.

⁵ Awnit et masin-es-ang nan ipogaw ay mangwani en, ‘Ipogaw nan apo sak-en’ dadat omali ay maitapi isnan iyIsrael. Imalkada nan ngadan nan apo isnan limada dadapay wasdin kanan en ipogaw Apo Dios daida.”

⁶ Nan apo ay manakabalin ay mentoltolay ya mangsalsalaknib isnan Israel et siya na nan kanana, “Sak-en nan nangwada isnan am-in ay wada ya sak-en gedan nan mangkombos isnan am-in. Maid teken is dios nodi sak-en et kedeng.

⁷ Ay waday nakaipadto ay kaneg nan inik-ikkak? No wada nan makaikkan et ikkanda ay kaneg nan sigod ay ik-ikkak isdin loglogina et enggana isnan kombosna.

⁸ Adi kayo omegyat ay ipogawko tay gegetkenyo ay menlogi id kasin enggana id wani et inpadtok nan am-in ay awnit ommat et dakayo nan mang-itakdeg ken sak-en. Ay waday teken is dios? Ay waday teken is manakabalin ay dios mo sak-en is egayko dindinnge? Maid.”