Isaias 43 - Kalin Apo Dios

Si Apo Dios Nan Mangisalakan 43:1-12

¹ Sik-a ay ili ay Israel, kanan nan apo ay nangboliw ken sik-a en, “Adika omegyat tay isalakak sik-a. Dakayo ay iyIsrael, inayagak dakayo et menbalin kayo ay ipogawko.

² No gomdang kayo isnan adaadaem ay danom et wadaak ken dakayo ta adi kayo maanod. No pilmi ay maliligatan kayo ay kaneg kayo mendad-aan isnan apoy et adi kayo mapoowan tay adi kayo masakitan isnan pamadpadas ken dakayo.

³ Tay sak-en nan apo ay Diosyo. Sak-en nan nadiosan ay Dios di Israel ay nang-isalakan ken dakayo. Bay-ak nan ili ay Egipto ta mawayaan kayo ya bay-ak nan il-ili ay Etiopia ya nan Seba.

⁴ Gapo tay napateg kayo ken sak-en ya laylaydek dakayo et bay-ak nan am-in di tapin di ili ta maisalakan kayo.

⁵ Adi kayo omegyat tay wadaak ken dakayo. Awnitak pasaaen nan Israelita ay wada isnan kaaddawiyan ay balaan di agew ya isnan lomnekan di agew.

⁶ Awnitak ibaga isnan ilagod ta palobosanda daida ya nan iyabagatan ta adida ipakpakod daida. Ibagak ken daida en, ‘Palobosanyo ay somaa nan ipogawko ay nagapo isnan anaddawi ay il-ili ya isnan am-in ay solsolin nan batawa.

⁷ Daida nan osto ay ipogawko et binoliwko daida ta ipailada nan kinadayawko.’

⁸ Ipatakdegyo nan ipogawko isnan pagbanagan ay mangpaneknek ken sak-en olay no kokowapenda ya totowengenda.

⁹ Tay madagdagop nan kailiili ta omalida makidnge. Dakayo ay nagapo isnan kailiili, ay waday diosyo ay makaibaga isnan ommat is kasin? Sino ken daida nan makaibaga isnan om-ommat id wani? Ikawityo ngalod nan mang-ibaga isnan maipanggep ken daida, ay mangpaneknek no tet-ewada ya mang-ibaga no tet-ewa nan kankananda.

¹⁰ Dakayo pay ay iyIsrael et dakayo nan mang-ibaga isnan maipanggep ken sak-en. Pinilik dakayo ay baak tapno manggetkanyo ken sak-en ya ta mangpati kayo ya tapno maawatanyo ay sak-en et kedkedeng nan Dios. Maid teken is dios nodi sak-en et kedeng. Ya maid pay polos dios is inmon-ona wenno is esa omon-onod.

¹¹ Sak-en et kedeng nan apo et kedkedengak is makaisalakan ken dakayo.

¹² Inbagak id kasin nan ommat daket omali ay mangbadang ken dakayo. Maid polos sinangdidios is nakaikkan isnan keg tona et dakayo nan mang-ibaga isnan maipanggep ken sak-en.”

Nan Balo Ay Ikkan Apo Dios 43:16-25

¹⁶ Id kasikasin et inomset nan apo isnan baybay is daan isnan gawana isnan mensassasa ay danom

¹⁷ danat itolong nan napigsa ay bonggoy di sosoldado et maanodda ya nan loganda ya nan kabayoda. Nalimonda et napateyda ay kaneg nan menkakateyan nan silaw di kandila.

¹⁸ Ngem kanan nan apo en, “Baken nan inom-ommat id kasin is nemnemnemenyo nodi nan awnitak ikkan.

¹⁹ Ilaenyo bawet nan balo ay banag ay ikkak tay om-ommat et. Mailayo id wani. Awnitak omset is daan isnan pondag ya is ginawang ta waday danom isdi.

²⁰ Olay nan atap ay animal ay kaneg nan atap ay aso ya nan koop et awnitda mangdaydayaw tay ipaayosko nan ginawang isnan pondag ay mang-ited is mainom isnan pinilik ay ipogaw.

²¹ Tay daida nan ipogawko ay binoliwko pala ken sak-en et kantaenda nan maidaydayawak.

²² Ngem bakenak is dinaydayawyo tay naoma kayo ay iyIsrael ken sak-en.

²³ Tay bakenak is nin-idatdatonanyo is napoowan ay kalnilo ya isnan ninpalpaltiyanyo isnan indatdatonyo et bakenak is dinaydayawyo. Egayak pinaligligat met dakayo ay mendawdawat is idatonyo wenno pinilpilit dakayo ay mendawdawat is incenso.

²⁴ Egay kayo linmaklako is incenso pala ken sak-en ya egayyo pinnek sak-en isnan taban di talakenyo nodi pinaawitanyo sak-en isnan basbasolyo. Naomaak et isnan ngawi ay inik-ikkanyo.

²⁵ Ngem sak-en kayet nan Dios ay mangkaan isnan basbasolyo et ikkak na gapo isnan kinadiosko. Adiyak et singilen nan basbasolyo.”