Isaias 42 - Kalin Apo Dios

Nan Baan Nan Apo 42:1-12

¹ Kanan nan apo, “Ilaenyo nan naay baak ay ipapigsak. Siya nan pinilik et siya nan mang-ipagasgasing ken sak-en. Itedko nan Ispiritok ta iyalina nan kinalinteg isnan kailiili isnan batawa.

² Adina ibib-iyad nan kalina isnan iib-ana isnan om-ombonanda ya adina bogbogtaken daida.

³ Adina dokogan nan teteteteen nan pammatida ya badangana nan kaseseg-ang. Nalinteg nan ipaik-ikkana isnan am-in ay ipogaw.

⁴ Adi madismaya isnan ik-ikkana nodi itoltoloyna engganay abakena am-in ay ngawi isnan batawa.” Et menses-eed nan kailiili isnan isolona.

⁵ Si Apo Dios nan nangboliw isnan batawa ya am-in ay mentetee ya inagtana is biyag nan mentetee isnan batawa ta men-angesda et id wani kanana isnan baana en,

⁶ “Sak-en ay apo nan nang-ayag ken sik-a daket agtan sik-a is panakabalinmo tapno makailam ta nalinteg nan maik-ikkan isnan batawa. Sik-a nan kanegko awak ay makitolag isnan am-in ay ipogaw. Et gapo ken sik-a et malawagan nan nemnem di kaipoipogaw isnan batawa.

⁷ Awnit bitagem nan matan nan kowap dakapay wayaan nan balod ay mentetee isnan menbolinget.

⁸ Sak-en et kedeng nan apo ay Dios et adi mabalin ay maitapi nan sinangdidios isnan kinangatok. Adiyak ipalobos ay itapida ay mangdayaw isnan tinagtago isnan mangdaydayawanda ken sak-en.

⁹ Am-in ay inbagak id kasin et natongpal et. Id wani pay et ipagtekko nan tapina ay egayyo dinnge ta dengngenyo esadapay ommat.”

¹⁰ Kantaenyo nan balo ay kanta ay mangdayaw isnan apo. Dakayo am-in isnan batawa, kantaanyo nan maidaydayawana. Dakayo ay om-omey isnan baybay ya dakayo ay mentetee isdi, dayawenyo siya. Menkanta kayo gedan ay wada isnan anaddawi ay il-ili ay mentetee is dadi.

¹¹ Pondag ya nan il-ili, dayawenyo si Apo Dios. Ipogaw id Kedar, dayawenyo gedan siya ya dakayo ay mentetee isnan ilin nan Sela et omey kayo isnan toktok di bilbilig ta ibogawyo nan gasingyo.

¹² Dakayo ay mentetee isnan anaddawi ay il-ili, dayawenyo ya ipangatoyo nan apo.