Isaias 40 - Kalin Apo Dios

Nan Gawis Ay Damag 40:1-11

¹ Kanan nan Diosyo en, “Liwliwaliwenyo nan ipogawko. Owen, liwliwaliwenyo daida.

² Pagasingenyo nan ipogaw di Jerusalem. Ibagayo ken daida en naanay nan ninligligatanda. Nasbot et nan basbasolda. Naanay et nan dosak ken daida.”

³ Wada nan mang-ibogbogaw en, “Isaganayo isnan pondag nan daanen nan apo ay awnit omali. Pagawisenyo nan daan ay mendaanan nan Dios tako.

⁴ No nadodontog nan daan ya nakakaongan et masapol ay simpaenyo. No abes natikotiko et paletgenyo ya nan ngawi ay daan et estenyo.

⁵ Dat maipaila nan kinadios nan apo et iilaen nan am-in ay ipogaw. Nan apo ay mismo nan nangwani isnan naay.”

⁶ Wada nan kali ay mangwani en, “Ipagtekmo nan naay.” Daket kanan, “Ngan di ipagtekko?” Danat kanan, “Ibagam en nan am-in ay ipogaw et kanegda logam ya nan kabegewda et kaneg nan bayaya ay nalaka ay maango.

⁷ Tay nan logam et nalaka ay may-osan ya nan sabsabong et mamaid no sip-oyan di dagem ay ibaan nan apo. Kinatet-ewana et baken makmakneg nan ipogaw mo nan logam.

⁸ Owen, tet-ewa ay nan logam et may-osan ya mamaid nan sabsabong ngem nan kankanan Apo Dios et wawawawada ay enggana.”

⁹ Dakayo ay iJerusalem, omey kayo isnan atakdag ay bilig ta ipagtekyo nan gawis ay damag. Ibiyadyo nan kaliyo ay adi kayo koma omegyat ay mang-ipagtek isnan gawis ay damag isnan mang-ibagaanyo isnan il-ilin nan Juda ay omal-ali nan Diosda.

¹⁰ Ilaenyo, naay omali et nan apo ay kangatowan ay mentolay isnan panakabalina ya ikakawitna nan kaipoipogaw ay insalakana.

¹¹ Ay-ayowanana nan ipogawna ay kaneg nan ikkan nan menbanbantay isnan kalnilona. Lak-eyena nan kabalbala ay nakapsot pay laeng danapay an-anosan ay mang-ipangpango isnan baban-eg nan an-akda.