Isaias 35 - Kalin Apo Dios

Nan Nadiosan Ay Daan 35:1-10

¹ Awnit gomasing nan pondag et mensabong nan bayaya isnan adi kapaay ay lota.

² Awnit menkanta ya menbogaw nan pondag gapo is gasingda. Et kabegbegewda nan bilig di Lebanon ya maloweb ay kaneg nan kaloweb nan om-a ay Carmel ya nan Saron. Awnit maila nan kabegew nan apo ay nan Dios tako ya maila gedan nan kangatona ya panakabalina.

³ Ibagayo na ta papigsaenyo nan nabannog nan ledengda ya nan menpaypayegpeg nan goloda tay kinmapsotda.

⁴ Ibagayo isnan nakaan nan ganasda ta tomoledda ay adida omegyat tay omali si Apo Dios ay mang-isalakan ken daida tay dosaena nan nang-ikkan is ngawi ken daida.

⁵ Awnit makaila nan kowap ya makadnge nan toweng.

⁶ Nan pilay et menyakingda dadapay mensala ya nan omel et menbogawda is gasingda. Awnit men-ayos nan danom isnan pondag

⁷ et nan menpoos ay naaango ay lota et menbalinda ay posong tay awnit ado nan menbala ay danom. Isnan logal ay naaango nan lota ay tean di atap ay aso et menbalin ay pagtobowan di tannobong ya balili.

⁸ Awnit wada nan nalawa ay daan ay makwani en Nadiosan ay Daan tay maid managbasol is mendad-aan isdi ya maid mang-al-allilaw isnan mendaan isdi.

⁹ Maid layon ya nasokil ay animal ay mendaan isdi tay kedeng nan insalakan nan apo nan mendaan isnan deey ay daan.

¹⁰ Awnitda omdan id Jerusalem ay men-gasgasing dadapay menkankanta ya menbogbogaw is gasingda. Et men-gasgasingda et ay eng-enggana tay maid et babawi ya seg-ang ay eng-enggana.